Ikona kroate, Luka Modriq, është bërë vetëm lojtari i katërt që ka arritur në shifrën e 200 ndeshjeve ndërkombëtare. Ndeshjen e 200-të, mesfushori legjendar e luajti në fitoren 1:0 të Kroacisë ndaj Panamasë, të mërkurën në mëngjes.
Vetëm edhe tre lojtarë të tjerë i kanë 200 e më shumë ndeshje për përfaqësueset e tyre. Cristiano Ronaldo aktualisht është i pakrahasueshëm me 230 ndeshje. Bader Al-Mutawa i Kuvajtit i ka 202 ndeshje, por tashmë e ka përfunduar karrierën. Dhe menjëherë pas tij janë Lionel Messi me 201 ndeshje dhe Modriqi me 200.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo40-vjeçari Modriq ka debutuar për Kroacinë më 1 mars 2006. Dhe 20 vjet më pas i ka plot 200 ndeshje ndërkombëtare.
Modriq ka shkruar histori për Kroacinë duke e udhëhequr drejt vendit të dytë në botë në vitin 2018 dhe drejt vendit të tretë në vitin 2022. Në vitin 2023, Kroacia ishte edhe finaliste e Ligës së Kombeve.
Mesfushori kroat ka karrierë të jashtëzakonshme edhe në nivel klubesh. Së fundi luajti për Milanin, por shkroi histori për Real Madridin ku luajti nga viti 2012 e deri në vitin 2025. Me Madridin i ka fituar gjashtë trofe të Championsit, katër tituj të La Ligas dhe shumë e shumë trofe të tjerë.
Ndeshja e 200-të nuk është vlerësuar prej më të mirave të Modriqit nga mediat kroate. Ai megjithatë kishte 69 pasime të sakta prej 78 tentimeve. Modriqi në të gjitha 19 ndeshjet që i ka luajtur në Kampionate Botërore ka pasur saktësi të pasimeve prej të paktën 80 për qind.
“Të luash 200 ndeshje për vendin tënd është e arritur e çmendur. Ai është shumë i rëndësishëm për ne, lideri ynë i madh, kapiteni ynë. Jemi shumë mirënjohës që e kemi”, ka thënë mbrojtësi i Kroacisë, Marin Pongraçiq.
Përfaqësuesja kroate u kujdes që ky moment historik të mos kalonte pa bujë. Për xhiron e nderit, lojtarët veshën bluza të veçanta me mbishkrimin “trashëgimi e pafundme”, para se të hedhnin kapitenin e tyre në ajër në shenjë festimi.
Për Ante Budimirin, që shënoi golin e fitores, fitorja në ndeshjen jubilare të Modriqit ishte e veçantë.
“Nuk ka shumë lojtarë në botë që luajnë më shumë se 200 ndeshje për ekipin e tyre nacional. Ta shohësh bluzën dhe të dish që ajo erdhi me një fitore kaq të rëndësishme, e bëri atë edhe më të veçantë. Jemi të lumtur për të dhe të lumtur që e kemi kapiten”, ka thënë Budimir.
Vetë Modriq ka folur për fitoren shumë të vështirë.
“Të arrish 200 ndeshje me fanellën më të dashur është vërtetë diçka e pabesueshme. Jam i lumtur dhe krenar për këtë. Ishte ndeshje shumë e vështirë, nga fillimi e deri në fund. Po luajmë me një ngarkesë, që nuk jemi të relaksuar. E kemi ditur rëndësinë e ndeshjes dhe kjo është vërejtur”, ka thënë Modriq.