Presidenti ukrainas, Volodymyr Zelensky, ka thënë të mërkurën se Ukraina do të vazhdojë të rrisë rrezen e sulmeve të saj në Rusi, duke postuar pamje të asaj që ai e quajti një sulm ndaj një objektivi në një distancë prej më shumë se 1,500 km.
Ukraina ka shtuar sulmet e saj brenda Rusisë në javët e fundit, duke synuar të shkatërrojë rafineritë e naftës, depot dhe portet dhe të paralizojë burimin më të madh të financimit të Moskës për luftën e saj në Ukrainë.
Në një postim në X, Zelensky ka thënë se shërbimi i sigurisë së Ukrainës kishte raportuar një sulm të suksesshëm thellë brenda Rusisë, duke e quajtur atë një fazë të re në përdorimin e armëve ukrainase për të kufizuar potencialin e luftës së Rusisë.
Presidenti ukrainas ka postuar një video të tymit që ngrihej në qiell, por nuk e ka identifikuar objektivin që është goditur.
“Distanca në vijë të drejtë është mbi 1,500 kilometra. Ne do të vazhdojmë të zgjerojmë këto rreze”, ka deklaruar ai.
Shërbimi i Sigurisë i Ukrainës, SBU, në një postim të mëvonshëm ka njoftuar se dronët e tij kanë goditur një stacion pompimi nafte ruse pranë qytetit të Permit gjatë natës, rreth 1,500 km larg Ukrainës.
Edhe
Ukraina sulmon Rusinë, të paktën 13 të vdekur e rreth 40 të plagosur
Të martën, një sulm me dron ukrainas shkaktoi një zjarr të madh në një rafineri ruse nafte në portin Tuapse të Detit të Zi, një sulm i tretë ndaj rafinerisë në më pak se dy javë.
Presidenti rus, Vladimir Putin, e ka përshkruar sulmin si provë të sulmeve në rritje të Ukrainës ndaj objektivave civile.
