Presidenti i Ukrainës, Volodymyr Zelensky, ka refuzuar propozimet për një zonë tampon midis forcave ukrainase dhe ruse si pjesë e një marrëveshjeje për paqe, duke thënë se ajo nuk reflekton realitetin e një lufte të kohëve të sotme.
“Vetëm ata që nuk e kuptojnë gjendjen teknologjike të luftës së sotme, propozojnë një zonë tampon”, u ka thënë ai gazetarëve të premten.
Komentet e tij erdhën pasi një raport sugjeroi se liderët evropianë po e marrin në konsideratë një zonë tampon 40 kilometra si pjesë të një marrëveshjeje armëpushimi apo një të pajtimit afatgjatë.
Lufta në Ukrainë është kthyer në një konflikt që po dominohet nga teknologjia e dronëve. Dhe sipas Zelenskyyt, një zonë tampon tashmë ekziston për shkak të rrezikut nga sulmet e dronëve në vijat e frontit.
Zonat tampon mund të krijojnë zona të demilitarizuara në mes të shteteve në luftë, si për shembull në Korenë e Veriut dhe të Jugut, dhe kufijtë fizikë të njohur si Perdja e Hekurt që ndau Bashkimin Sovjetik dhe Perëndimin pas Luftës së Dytë Botërore.
Siç ka shkruar “Politico”, diplomatët evropianë kanë thënë se propozimi është që një rrip i tokës në Ukrainë të bllokohej si zonë mes dy forcave ushtarake.
Por Zelensky ka thënë se tashmë ekziston një zonë në të dyja palët e frontit në të cilat artileria e rëndë nuk mund të operojë për shkak të dronëve.
“Sot, armët tona të rënda janë të vendosura rreth 10 kilometra larg njëra-tjetrës, sepse gjithçka goditet nga dronët”, ka thënë ai. “Kjo ‘zonë tampon’ – unë do ta quaja ‘zonë e vdekur’, e disa ‘të hirtë’ – tashmë ekziston”.
Çfarëdo marrëveshje e cila do të nënkuptonte që Ukraina të japë territor për zona të tilla duhet të refuzohet, ka thënë Zelensky. “Nëse Rusia do distancë më të madhe nga ne, duhet të tërhiqen prapa nga territoret e okupuara përkohësisht të Ukrainës”.
Ai ka thënë se Rusia nuk është e gatshme për diplomaci, por po përpiqet të gjejë rrugë për të shtyrë fundin e luftës.
Një përpjekje e udhëhequr nga Shtetet e Bashkuara të Amerikës për t’i dhënë fund pushtimit rus, që ka zgjatur tash e 40 muaj, duket se po humb ritmin.
Një takim mes presidentit amerikan Donald Trump, Zelenskyt dhe liderëve evropianë javën e shkuar nxiti shpresën për samit të mundshëm mes liderit ukrainas dhe presidentit rus, Vladimir Putin. Por shpresat janë zbehur dukshëm. Dhe kancelari gjerman, Friedrich Merz ka thënë se me shumë gjasë s’do të ketë takim pasi Putini nuk po shpreh dëshirë të marrë pjesë.
Rusia ka lëshuar 629 dronë e raketa në Kiev në orët e para të së enjtes, duke vrarë 23 persona në sulmin prej më të mëdhenjve ndër muaj. Dy raketa madje kanë goditur zyrat e Bashkimit Evropian në qendër të Kievit.
Pas bisedimeve në Toulon të Francëz, Merz dhe presidenti francez, Emmanuel Macron, kanë thënë se do të rrisin presionin mbi Rusinë dhe Putinin për shkak të mosinteresimit për t’i dhënë fund luftës. Macron ka thënë se nëse Putini nuk respekton ultimatumin e deri të hënës për të vendosur për takim “do të dëshmohej se Putini ka mashtruar Trumpin”.
Merz ndërkaq ka sugjeruar se lufta do të zgjasë edhe disa muaj.
E të premten, 26 shtetet anëtare të Bashkimit Evropian kanë nënshkruar një deklaratë të përbashkët të përpiluar nga shefja për Politikë të Jashtme e Siguri, Kaja Kallas, me të cilën dënohen sulmet ruse në Kiev.
Dokumenti i cili e kritikon natyrën e pamatur të sulmeve të Rusisë dhe shpërfilljen që ajo ka shpërfaqur për të drejtën ndërkombëtare, është nënshkruar pas shqetësimeve të shprehura nga eksponentë të BE-së pas sulmit rus që la të vrarë 23 persona.
“Këto krime vetëm sa e përforcojnë vendosmërinë tonë për t’i mbështetur Ukrainën dhe popullin e saj në mbrojtjen kundër Rusisë dhe në përpjekjet e tyre për paqe gjithëpërfshirëse, të drejtë dhe të qëndrueshme”, thuhet në deklaratë.
Deklaratën nuk e ka nënshkruar Hungaria, shtet ky anëtar i BE-së që në vazhdimësi ka refuzuar ta dënojë Rusinë aleate për luftën në Ukrainë.
Në dokumentin e BE-së jepet po ashtu zotimi për vazhdimin dhe rritjen e mbështetjes për Ukrainën në formën e përshpejtimit të punës për vendosje të sanksioneve të reja kundër Rusisë. Aty theksohet gjithashtu se sulmet e qëllimshme ruse kundër civilëve dhe objekteve joushtarake përbëjnë krim lufte dhe paralajmërohet se të gjithë përgjegjësit për shkeljen e të drejtave ndërkombëtare humanitare do të mbahen përgjegjës.
Si pasojë e sulmit me 23 viktima dhe në të cilin janë dëmtuar edhe objektet e Këshillit britanik si dhe zyrat e BE-së në Kiev, Britania e Madhe dhe Bashkimi Evropian i kanë ftuar në sqarime përfaqësuesit e tyre rusë.
Sulmi i së enjtes ka qenë më vdekjeprurësi në kryeqytetin ukrainas që kur është mbajtur në Alaskë samiti mes president amerikan, Donald Trump, dhe atij rus, Vladimir Putin.
Në mesin e viktimave kanë qenë edhe katër fëmijë, që mbetën të vdekur pasi bombat ruse e goditën ndërtesën ku ata banonin në Darnytsky.