Presidenti i Ukrainës Volodymr Zelensky ka paralajmëruar se lufta po shkon në Rusi pas një sulmi me dronë në orët e para të mëngjesit në Moskë.
Zelensky tha se sulmet në territorin rus ishin një "proces i pashmangshëm, i natyrshëm dhe absolutisht i drejtë" i luftës midis dy vendeve.
Ministria ruse e mbrojtjes tha se tre drone ukrainas u rrëzuan të dielën, ndërsa dy u përplasën në një ndërtesë ku kishte disa zyra.
Aeroporti Vnukovo, në jugperëndim të qendrës së qytetit, u mbyll gjithashtu për pak kohë.
Kryetari i bashkisë së qytetit Sergei Sobyanin tha se fasadat e dy ndërtesave të zyrave ishin dëmtuar lehtë.
Fotot nga vendi i ngjarjes tregojnë se në cep të ndërtesave janë dëmtuar disa xhama, me mbeturina të shpërndara në tokë poshtë.
Një dëshmitare okulare, e cila dha vetëm emrin e saj të parë si Liya, i tha agjencisë së lajmeve Reuters se shihej zjarr dhe tym.
Fluturimet u pezulluan për pak kohë nga Aeroporti Vnukovo, në jugperëndim të qendrës së qytetit dhe avionët në hyrje u ridrejtuan në aeroporte të tjera.
Ukraina merr rrallë përgjegjësinë për sulmet në Rusi, por në një fjalim video të dielën nga qyteti perëndimor i Ukrainës, Ivano-Frankivsk, Zelensky tha se Ukraina po forcohej.
“Sot është dita e 522-të e të ashtuquajturit 'Operacion Special Ushtarak', për të cilin udhëheqja ruse mendoi se do të zgjaste disa javë”, tha ai. “Gradualisht, lufta po kthehet në territorin e Rusisë - në qendrat e saj simbolike dhe bazat ushtarake, dhe ky është një proces i pashmangshëm, i natyrshëm dhe absolutisht i drejtë”.