Ushtria izraelite po vazhdon sulmet kundër objektivave të Houthive në Jemen

Ministri izraelit i Mbrojtjes, Israel Katz, ka deklaruar të hënën se Ushtria e Izraelit është duke i sulmuar objektivat e grupit militant Houthi në portin e Hodeidah në Jemen, ka shkruar Reuters.

Sipas tij, ushtria është duke u “kundërpërgjigjur fuqishëm ndaj çdo përpjekjeje për ta rindërtuar infrastrukturën terroriste të goditur më parë”.

Që prej fillimit të luftës së Izraelit kundër grupit militant palestinez, Hamas, në Rripin e Gazës në tetorin e vitit 2023, Houthit e mbështetur e të financuar nga Republika Islamike e Iranit kanë sulmuar anijet tregtare në Detin e Kuq, në atë që e kanë klasifikuar si akt solidariteti me palestinezët.

Izraeli është kundërpërgjigjur duke lansuar sulme ndaj tyre, përfshirë bombardime në portin jetik detar të Hodeidah.

“Siç e kam bërë të qartë edhe më parë  – fati i Jemenit është i njëjtë me fatin e Teheranit. Houthit do ta paguajnë shtrenjtë për lëshimin e raketave drejt Shtetit të Izraelit”, ka shtuar Katz.