Trumpi pret sot Netanyahun në Shtëpinë e Bardhë për të shtyrë përpara planin e Gazës

Presidenti i SHBA-së, Donald Trump, pritet të shtyjë përpara armëpushimin e bllokuar në Gazë, kur të takohet me kryeministrin izraelit, Benjamin Netanyahu të hënën për bisedime, e gjatë të cilave do të diskutohet edhe për shqetësimet e Izraelit për Hezbollahun në Liban dhe Iran.

Netanyahu ka thënë këtë muaj se Trumpi e kishte ftuar atë për bisedime, ndërsa Uashingtoni shtyn përpara krijimin e një qeverisjeje kalimtare dhe një force ndërkombëtare sigurie për enklavën palestineze.

Netanyahu, i cili do të takohet me Trumpin në klubin e tij në plazhin Mar-a-Lago në mbrëmje me kohë të Kosovës, ka thënë më 22 dhjetor se diskutimet pritet të mbulojnë fazën e dytë të armëpushimit në Gazë, si dhe Iranin dhe Libanin.

Uashingtoni ka ndërmjetësuar armëpushime në të tri frontet, por Izraeli është i kujdesshëm ndaj armiqve të tij për shkak të mundësisë që ato të rikthejnë fuqitë e tyre ushtarake pasi ato janë dobësuar ndjeshëm në luftë.

Për Gazën, Izraeli dhe Hamasi kanë rënë dakord në tetor për planin e Trumpit për t'i dhënë fund luftës, i cili parasheh ndër të tjera që Izraeli të tërhiqet nga Gaza dhe Hamasin të heqë dorë nga armët e tij dhe të heqë dorë nga një rol qeverisës në enklavë.

Faza e parë e armëpushimit përfshinte një tërheqje të pjesshme izraelite, një rritje të ndihmës dhe shkëmbimin e pengjeve për të paraburgosurit dhe të burgosurit palestinezë.

Një zyrtar izraelit në rrethin e Netanyahut ka thënë se kryeministri do të kërkojë që faza e parë e armëpushimit të përfundojë duke kthyer Hamasi eshtrat e pengut të fundit izraelit të mbetur në Gazë, përpara se të kalojë në fazat e ardhshme.

Izraeli ende nuk e ka hapur pikën e kalimit Rafah midis Gazës dhe Egjiptit, gjithashtu një kusht i planit të Trumpit, duke thënë se do ta bëjë këtë vetëm pasi të kthehen eshtrat e Gvilit.