Të paktën 22 persona të vdekur nga sulmet ajrore izraelite në Rafah

Sulmet ajrore izraelite në qytetin jugor të Gazës, Rafah, kanë vrarë të paktën 22 persona, përfshirë gjashtë gra dhe pesë fëmijë, thanë zyrtarët shëndetësorë të Gazës, raporton agjencia “AP”.

Një nga fëmijët e vrarë në sulmet gjatë natës së së hënës ishte vetëm 5 ditësh.

Izraeli ka kryer rregullisht sulme ajrore në Rafah që nga fillimi i luftës më 7 tetor dhe ka kërcënuar se do të dërgojë trupa tokësore, duke thënë se Rafah është bastioni i fundit i madh i Hamasit në Gaza. Mbi një milion palestinezë kanë kërkuar strehim në qytetin në kufirin me Egjiptin. Shtetet e Bashkuara të Amerikës dhe aleatët i kanë kërkuar Izraelit të mos e pushtojë Rafahun, nga frika e një katastrofe humanitare.

Sekretari amerikan i Shtetit Antony Blinken ka nisur të hënën misionin e tij të shtatë diplomatik në Lindjen e Mesme që nga fillimi i luftës Izrael-Hamas më shumë se gjashtë muaj më parë, raporton Associated Press.

Vizita e Blinkenit - e cila përfshin pak më shumë se një ditë në Arabinë Saudite para ndalesave në Jordani dhe Izrael të martën dhe të mërkurën - vjen mes shqetësimeve të ripërtërirë në lidhje me përhapjen e konfliktit në Lindjen e Mesme dhe me perspektiva dikur premtuese për afrimin izraelito-saudite në mënyrë efektive.

Izraeli refuzon të marrë në konsideratë një nga kushtet kryesore të sauditëve për normalizimin e marrëdhënieve: krijimin e një shteti palestinez.