Të paktën 10 të vrarë në një stacion policor në Pakistan

Të paktën 10 policë u vranë dhe gjashtë të tjerë u plagosën nga militantët në një sulm të hënën, në një stacion policie në veriperëndim të Pakistanit, ndërsa dhuna eskaloi përpara zgjedhjeve të përgjithshme këtë javë, ka raportuar Reuters.

Rreth orës 3 të mëngjesit, militantët sulmuan stacionin e policisë me snajper dhe më pas hynë në ndërtesë, kanë thënë oficerët e policisë në rajonin Draban të Pakistanit në provincën Khyber-Pakhtunkhwa.

“Pasi hynë në ndërtesë, terroristët përdorën granata dore, të cilat u shkaktuan viktima policisë” ka thënë Malik Anees ul Hassan, zëvendës mbikëqyrës i policisë në Draban.

Nuk ishte menjëherë e qartë se kush ishte pas sulmit dhe nëse sulmi kishte lidhje me zgjedhjet.

Të mërkurën një kandidat i asamblesë kombëtare u qëllua për vdekje në Khyber-Pakhtunkhwa. Në të njëjtën ditë, një tjetër lider politik u qëllua për vdekje në zyrën zgjedhore të partisë së tij në provincën Balochistan. Të martën, një sulm me bombë pas një tubimi zgjedhor vrau katër persona në Balochistan. Shteti Islamik mori përgjegjësinë.

Pakistani ka parë rigjallërim të sulmeve nga militantët islamikë, veçanërisht sulme që shënjestrojnë personelin e sigurisë së vendit, që nga viti 2022, kur u prish armëpushimi midis talebanëve pakistanezë dhe qeverisë.