Dhjetëra civilë janë evakuuar nga qyteti port ukrainas, Mariupol, pas disa javësh nën rrethim nga forcat ruse brenda fabrikën e çelikut Azovstal.
Një grua, e cila ka qëndruar për rreth dy muaj brenda fabrikës, ka thënë se gjatë kësaj kohe nuk kishte parë dritë dielli me sy, raportoi BBC-ja të hënën.
Ajo tha se shpesh mendonte që nuk do të arrinte të mbijetonte.
Të dielën u evakuuan disa civilë nga kjo fabrikë me ndërmjetësimin e OKB-së dhe pajtimin e Rusisë e Ukrainës.
Presidenti ukrainas, Volodymyr Zelensky, ka njoftuar se një grup i madh është gjithashtu në rrugë për në Zaporizhzhia, rajon i kontrolluar nga Ukraina.
“Grupi i parë prej rreth 100 personash tashmë po shkon drejt zonës së kontrolluar. Të hënën do t'i takojmë ata në Zaporizhzhia. Faleminderit ekipit tonë që së bashku me OKB-në, po punojnë për evakuimin e civilëve të tjerë nga fabrika”, ka shkruar Zelensky në Twitter të dielën mbrëma.