-
Përktheu:
Flutura Gashi-Mehmeti
- 25 shtator 2025 09:59
- Shpërndaje në:
Ish-presidenti francez, Nicolas Sarkozy do të mësojë të enjten fatin e tij në një gjyq për korrupsion, në të cilin ai akuzohet se ka marrë miliona euro nga udhëheqësi i ndjerë libian, Muammar Gaddafi për të ndihmuar në financimin e fushatës së tij zgjedhore të vitit 2007.
Prokurorët francezë kanë kërkuar një dënim me shtatë vjet burgim për Sarkozyn, i cili ishte president nga viti 2007 deri në vitin 2012. Ai mund të apelojë nëse shpallet fajtor, gjë që ka të ngjarë të pezullojë dënimin e tij, raporton Reuters.
70-vjeçari është në gjyq që nga janari me akuzat për "fshehje të përvetësimit të fondeve publike, korrupsion pasiv, financim të paligjshëm të fushatës dhe konspiracion kriminal me qëllim kryerjen e një krimi".
Hetuesit pretendojnë se ai bëri një pakt korruptiv me qeverinë libiane. Në diskutim është një çështje e errët që dyshohet se përfshin spiunë libianë, një terrorist të dënuar, tregtarë armësh dhe akuza se Gaddafi i siguroi fushatës së Sarkozyt miliona euro të dërguara në Paris në valixhe.
Sarkozy ka mohuar vazhdimisht çdo faj dhe ka thënë se çështja është e motivuar politikisht.
Pavarësisht problemeve të vazhdueshme ligjore dhe heqjes së Legjionit të Nderit, dekoratës më të lartë të Francës, në qershor, Sarkozy mbetet një figurë me ndikim në skenën politike franceze.
Sarkozy është përballur me beteja ligjore që kur është larguar nga detyra.
Vitin e kaluar, gjykata më e lartë e Francës mbështeti dënimin e tij për korrupsion dhe abuzim me ndikimin, duke e urdhëruar atë të mbante një etiketë elektronike për një vit, e para për një ish-kryetar shteti francez. Etiketa tani është hequr.
Sarkozy shpallet fajtor për disa akuza në rastin e financimit të fushatës
Nicolas Sarkozy
Photo: Associated Press
Ish-presidentin francez, Nicolas Sarkozy, është shpallur fajtor për disa nga akuzat, në gjyqin e tij për financimin e supozuar të paligjshëm të fushatës së tij presidenciale të vitit 2007 me para nga qeveria e udhëheqësit të atëhershëm libian Moammar Gadhafi.
Gjykata në Paris ende nuk ka bërë të ditur detaje nga vendimi i saj rreth dënimit të 70-vjeçarit Sarkozy. Ky hap do të vijë më vonë në procedurat gjyqësore të enjten. Sarkozy mund ta apelojë vendimin, i cili do të pezullojë çdo dënim në pritje të apelit.
Prokurorët kanë kërkuar dënim me burg në kohëzgjatje prej shtatë vjetësh.
Sarkozy, i shoqëruar nga gruaja e tij, këngëtarja dhe modelja Carla Bruni-Sarkozy, ishte i pranishëm në sallën e gjyqit, e cila ishte gjithashtu e mbushur me gazetarë dhe qytetarë. Me këtë vendim, 70-vjeçari Sarkozy bëhet ish-presidenti i parë francez i shpallur fajtor për pranimin e fondeve të huaja të paligjshme në fushatën presidenciale.
Sarkozy, i cili u zgjodh në vitin 2007, por humbi garën për rizgjedhje në vitin 2012, mohoi të gjitha shkeljet gjatë një gjyqi tremujor që përfshinte edhe 11 të bashkëpandehur, përfshirë tre ish-ministra.
Pavarësisht skandaleve të shumta ligjore që kanë errësuar trashëgiminë e tij presidenciale, Sarkozy mbetet një figurë me ndikim në politikën e krahut të djathtë në Francë.