Sllovakia ka pezulluar përkohësisht importet e grurit nga Ukraina, tha një zëdhënës i Qeverisë për CNN-in.
Vendimi u mor pasi Polonia dhe Hungaria ndaluan importet e grurit dhe produkteve të tjera ushqimore nga Ukraina.
“Sot do të mblidhet një grup pune për të diskutuar këtë temë. Rezultati i takimit do të komunikohet më vonë”, ka thënë ky zëdhënës.
Polonia njoftoi ndalimin e saj të shtunën, duke synuar “të mbrojë tregun polak bujqësor kundër destabilizimit”, tha në një deklaratë zyra e kryeministrit polak.
Ukraina iu përgjigj masës duke thënë se “i vjen keq për vendimin e homologëve të saj polakë”, duke shtuar se është e gatshme të bashkëpunojë me Poloninë në një hetim të çdo abuzimi të mundshëm.
Ministri hungarez i Bujqësisë, Istvan Nagy njoftoi të dielën se Budapesti do të ndalojë përkohësisht importin e drithit, farave vajore dhe produkteve të tjera bujqësore nga Ukraina.
Edhe
Polonia ndal furnizimin me armatim për Ukrainën
Kur Rusia pushtoi Ukrainën, ajo bllokoi portet dhe rrugët detare të përdorura për të eksportuar grurë ukrainas në Afrikë dhe Lindjen e Mesme. Nga frika e urisë së përhapur, Bashkimi Evropian hoqi detyrimet për grurin nga Ukraina për të lehtësuar shpërndarjen në ato tregje globale.
Që atëherë, gruri ukrainas ka rrjedhur në Poloni, por pjesa më e madhe e tij ka mbetur në vend, duke ulur çmimin dhe duke bërë që fermerët polakë të pësojnë humbje të konsiderueshme financiare.
