“Unë vazhdimisht mendoj se çfarë mund të ishte bërë”, tha Mark Talley në konferencën për shtyp të familjeve, duke mbajtur një foto të nënës së tij të vrarë, Geraldine Talley, 62 vjeç. I fejuari i saj, i cili u mbijetoi të shtënave, e pa atë të qëllohej për vdekje, tha djali i saj. Mosveprimi ndaj kërcënimit të dhunës supremaciste të bardhë, tha Talley, çoi në gjakderdhjen e fundjavës së kaluar
(AP) - Të afërmit e 10 afro-amerikanëve, të masakruar në një supermarket në Buffalo iu lutën kombit të enjten që të përballet dhe ta ndalojë dhunën raciste, derisa agonia e tyre shihet në lotët e një fëmije 12-vjeçar, disa orë pasi vrasësi, amerikan i bardhë, u përball në heshtje me aktakuzën për vrasje në gjykatë.
Jaques “Jake” Patterson, i cili humbi babanë e tij, mbuloi fytyrën me duar, ndërsa nëna e tij fliste në një konferencë shtypi. Pasi ajo mbaroi, Jake ra në krahët e Al Sharpton, aktivistit veteran të të drejtave civile, dhe qau në heshtje, duke përdorur bluzën e tij për të fshirë lotët.
Zemra të thyera
“Zemra e tij është thyer”, tha nëna e tij, Tirzah Patterson, duke shtuar se djali i saj kishte probleme me gjumin dhe ushqimin.
“Si nënë, çfarë duhet të bëj për ta ndihmuar atë ta kalojë këtë?” – tha ajo.
Ish-burri i saj, Heyward Patterson, një prift 67-vjeçar i kishës, u qëllua për vdekje të shtunën në Tops Friendly Market. E njëjta gjë ndodhi me nënën 86-vjeçare dhe shoqen më të mirë të Robin Harrisit, Ruth Whitfield, në një ditë kur ata duhej të shkonin të shihnin shfaqjen turne në Broadway “Ain't Too Proud”.
“Ai i ri racist më mori nënën time”, tha Harris, duke u dridhur dhe duke i shkelur këmbët ndërsa fliste.
“Si guxon!” - Harris.
“Duhet që kjo dhunë të ndalet”, shtoi ajo. “Ne duhet ta rregullojmë këtë dhe duhet ta rregullojmë tani”.
Më herët gjatë ditës në një pjesë tjetër të qytetit, i akuzuari i armatosur Payton Gendron, 18 vjeç, u paraqit për një kohë të shkurtër në gjykatë për të dëgjuar se ai ishte paditur për vrasjet.
“Payton, ti je frikacak!”, dikush bërtiti në galerinë e sallës së gjyqit, ndërsa ai u largua.
Gendron, avokati i të cilit u deklarua i pafajshëm për të në një paraqitje të mëparshme në gjykatë, nuk foli. Avokatët e tij më vonë nuk pranuan të komentojnë. Ai po mbahet pa kusht dhe do të kthehet në gjykatë më 9 qershor.
Autoritetet po hetojnë mundësinë e akuzave për krim të urrejtjes dhe terrorizëm kundër Gendronit, i cili me sa duket detajoi planet e tij për sulmin dhe motivimin e tij racist në qindra faqe shkrimesh që ai postoi në internet pak para të shtënave. Ajo u transmetua drejtpërdrejt nga një kamerë e montuar në helmetë.
“Ne duhet t’i mbajmë përgjegjës të gjithë ata që kanë ndihmuar dhe nxitur urrejtjen në këtë vend”, tha Sharpton në konferencën për shtyp jashtë Kishës Baptiste në Buffalo. Grupi i aktivistëve të të drejtave civile, Rrjeti Kombëtar i Veprimit, planifikon t’i mbulojë shpenzimet e funeralit për të vrarët.
Masakra që po shtang Amerikën
Masakra në supermarketin Tops ishte shqetësuese edhe në një komb që është bërë pothuajse i mpirë ndaj të shtënave masive. Gjithsej u qëlluan 13 persona, të gjithë me përjashtim të dyve me ngjyrë. Shkrimet në internet të Gendronit thanë se ai e kishte planifikuar sulmin pasi u magjeps me ideologjinë supremaciste të bardhë që hasi në internet.
“Unë vazhdimisht mendoj se çfarë mund të ishte bërë”, tha Mark Talley në konferencën për shtyp të familjeve, duke mbajtur një foto të nënës së tij të vrarë, Geraldine Talley, 62 vjeç. I fejuari i saj, i cili u mbijetoi të shtënave, e pa atë të qëllohej për vdekje, tha djali i saj.
Mosveprimi ndaj kërcënimit të dhunës supremaciste të bardhë, tha Talley, çoi në gjakderdhjen e fundjavës së kaluar.
“Është si Dita e Groundhogut. Ne e kemi parë këtë pa pushim”, tha ai.
Stephen Belongia, agjenti kryesor i FBI-së në Buffalo, tha në një konferencë shtypi se agjentët po punonin ende për t’i bashkuar motivet e Gendronit dhe se si ai arriti në pikëpamjet e tij ekstremiste. Hetuesit kanë ekzaminuar dokumentet në internet, të cilat përfshinin një ditar privat në platformën e bisedës Discord.
Ditari thoshte se Gendron e kishte planifikuar sulmin e tij në fshehtësi, pa ndihmë nga jashtë. Gjysmë ore përpara se të hapte zjarr, ai ftoi një grup të vogël njerëzish për të parë shkrimet e tij, tha Discord.
Pesëmbëdhjetë përdorues të Discord pranuan, sipas një personi të njohur me hetimin, i cili nuk ishte i autorizuar të fliste publikisht për të.
Nevoja për mbështetje
Nuk ishte e qartë se sa shpejt ata njerëz e panë atë që ai kishte shkruar ose nëse ndonjë u përpoq ta lajmëronte zbatimin e ligjit.
Guvernatori i Nju-Jorkut, Kathy Hochul, ka autorizuar prokuroren e përgjithshme të shtetit, Letitia James, të hetojë nëse kompanitë e mediave sociale që përdorte Gendron ishin përgjegjëse për “ofrimin e një platforme për të planifikuar dhe promovuar dhunën”.
Komisionari i Policisë së Buffalos, Joseph Gramaglia, tha të enjten se përdoruesit e mediave sociale mund të luajnë gjithashtu një rol duke folur kur shohin njerëz që postojnë përmbajtje të dhunshme ose kërcënuese.
“Duhet t'i largoni këta njerëz”, tha ai në një konferencë. “Ekspozoni ata që po nxjerrin ato lloj pikëpamjesh ekstreme dhe le t'i çrrënjosim ato”.
Në konferencën për shtyp të familjeve, Tirzah Patterson kishte një kërkesë tjetër.
“Kam nevojë që fshati të më ndihmojë të ngrihem dhe të jem këtu për djalin tim”, tha ajo, duke u kërkuar njerëzve të luten “që Zoti të na japë forcë për ta kaluar këtë”.
“Ne jemi fshati”, brohoriti avokati i të drejtave civile, Ben Crump, duke inkurajuar anëtarët e familjes së viktimave të tjera që të bashkohen.
Përktheu: Albina Sahiti
