Një rrjet spiunazhi që operonte në Evropë nga Bjellorusia u shkatërrua nga shërbimet e inteligjencës të Republikës Çeke, Hungarisë dhe Rumanisë, njoftoi agjencia çeke e kundërzbulimit.
Agjencia çeke, e njohur edhe si BIS, njoftoi se një ekip agjentësh evropianë zbuluan spiunë në disa vende evropiane që punonin për agjencinë e sigurisë KGB të Bjellorusisë.
BIS tha se një ish-zëvendësdrejtor i shërbimit të inteligjencës moldave SIS, i cili i dorëzoi informacion të klasifikuar KGB-së, ishte në mesin e tyre, raporton AP.
Çekët dëbuan gjithashtu një agjent bjellorus i cili vepronte nën maskën e një diplomati.
Ministria e Jashtme çeke njoftoi se atij iu dhanë 72 orë për t'u larguar nga Republika Çeke.
Agjencia çeke tha se Bjellorusia arriti të krijojë rrjetin pasi që diplomatët e saj ishin në gjendje të udhëtojnë lirshëm nëpër vendet evropiane.
“Për t’i luftuar me sukses këto aktivitete armiqësore në Evropë, ne duhet të kufizojmë lëvizjen e diplomatëve të akredituar nga Rusia dhe Bjellorusia brenda zonës Shengen”, tha në një deklaratë kreu i agjencisë çeke , Michal Koudelka.