Presidenti i SHBA-së, Donald Trump, njoftoi se ka rënë dakord për një marrëveshje tregtare me kryeministrin e Indisë, Narendra Modi, sipas së cilës SHBA-ja do t’i ulë tarifat për mallrat nga India në 18% nga 25% sa i kishte deri më tash, raporton “BBC”.
Në një postim në Truth Social, Trump tha se India do t’i ulë barrierat tregtare në zero dhe gjithashtu do ta ndalojë blerjen e naftës ruse. Një ndëshkim shtesë tarifor prej 25%, i vendosur për shkak të refuzimit të New Delhit për ta ndalur blerjen e naftës nga Rusia, do të hiqet.
Njoftimi vjen më pak se një javë pasi India dhe Bashkimi Evropian shpallën një marrëveshje historike tregtare, e cila i dha fund gati dy dekadave bisedimesh.
Modi shkroi në rrjetin social “X” se është “i kënaqur” që është arritur një marrëveshje me SHBA-në.
Në postim, Trumpi tha se një telefonatë në mëngjes me Modin përfshinte diskutime mbi tregtinë dhe luftën Rusi-Ukrainë.
“Ai ra dakord ta ndalojë blerjen e naftës ruse dhe të blejë shumë më tepër naftë nga Shtetet e Bashkuara dhe, potencialisht, nga Venezuela”, shkroi Trump në “Truth Social”.
Trump shtoi se, me kërkesë të Modit, ai menjëherë “ra dakord për një marrëveshje tregtare” që do ta sillte uljen e tarifave dhe reduktimin e tarifave dhe barrierave jotarifore të Indisë në zero.
Gjithashtu, Trump tha se Modi u angazhua të blejë më shumë se 500 miliardë dollarë mallra amerikane, përfshirë produkte të energjisë, teknologjisë, bujqësisë dhe qymyrit.
Marrëdhëniet tregtare mes SHBA-së dhe Indisë kanë qenë të tensionuara që kur SHBA vendosi tarifa prej 50% mbi mallrat nga India — më të lartat për një vend në Azi — në gusht, përfshirë një penalitet prej 25% të lidhur me blerjen e naftës ruse nga India.
Një zyrtar i Shtëpisë së Bardhë i konfirmoi BBC-së se tarifat e lidhura me naftën ruse do të hiqen si pjesë e marrëveshjes dhe se tarifat e tjera do të ulen për ta çuar normën në 18%.