SHBA-ja akuzon Kinën se po i ikë angazhimeve të tregtisë së lirë

Shtetet e Bashkuara të Amerikës kanë akuzuar Kinën për dështimin në përmbushjen e angazhimeve të saj ndaj Organizatës Botërore të Tregtisë, duke thënë se po eksplorojnë mënyra të reja për të luftuar praktikat agresive tregtare kineze.

Në raportin e saj vjetor mbi pajtueshmërinë kineze me rregullat e OBT-së, Zyra e Përfaqësuesit të Tregtisë së SHBA-së ka thënë të mërkurën se Kina nuk po i mban premtimet që ka bërë të hapur tregjet e saj ndaj konkurrencës së huaj kur iu bashkua agjencisë 164-anëtarëshe me bazë në Gjenevë në vitin 2001.

"Kina në vend të kësaj ka ruajtur dhe zgjeruar qasjen e saj të udhëhequr nga shteti, jo-treg ndaj ekonomisë dhe tregtisë”, tha Përfaqësuesja e Tregtisë e SHBA-së Katherine Tai. “Politikat dhe praktikat e Kinës sfidojnë premisat e rregullave të OBT-së dhe shkaktojnë dëm serioz për punëtorët dhe bizneset në mbarë botën”, ka shtuar ajo, raporton AP News.

Ndër të tjera, Shtetet e Bashkuara përsëritën akuzat e kahershme se Kina përdor subvencione dhe rregullore për të favorizuar kompanitë e veta në kurriz të konkurrentëve të huaj, duke thënë se detyron kompanitë amerikane dhe të huaja të dorëzojnë teknologjinë e çmuar si çmimin e aksesit në tregjet kineze.