SHBA: Dhjetëra luftëtarë të IS-it u arrestuan, katër gra që mbaheshin me zinxhirë u shpëtuan

Luftëtarët kurdë nga Siria të mbështetur nga SHBA-ja arrestuan dhjetëra militantë të Shtetit Islamik dhe shpëtuan katër gra që mbaheshin të lidhura me zinxhirë në tunele në kampin masiv al-Hol, në verilindje të Sirisë, ku strehohen familjet e IS-it, tha ushtria amerikane të mërkurën.

Operacioni, i cili ka vazhduar për dy javë, është pjesë e një përpjekjeje të vazhdueshme për të thyer një rrjet të madh të IS-it në kamp, ​​i cili shihet gjerësisht si një terren për gjeneratën e ardhshme të ekstremistëve, raportoi AP-ja.

Sipas Komandës Qendrore të SHBA-së, Forcat Demokratike Siriane të udhëhequra nga kurdët gjetën katër gratë në tunele të hënën. Ato ishin torturuar nga mbështetësit e IS-it, tha koloneli i ushtrisë amerikane, Joe Buccino.

Kampi al-Hol në provincën Hassakeh të Sirisë, është parë prej kohësh si një problem në rritje dhe atje ka pasur një numër operacionesh ushtarake dhe bastisjesh për të çrrënjosur kërcënimet e IS-it.

Rreth 50,000 sirianë dhe irakianë gjenden në tenda në kampin e rrethuar. Rreth 20,000 prej tyre janë fëmijë; shumica e pjesës tjetër janë gra dhe të veja të luftëtarëve të IS-it. Në një seksion të veçantë të kampit të ruajtur mirë, të njohur si aneks, janë edhe 2000 gra nga 57 vende të tjera. Ato konsiderohen si mbështetëset më të mëdha të IS-it, së bashku me fëmijët e tyre.