-
Përktheu:
Flutura Gashi-Mehmeti
- 23 tetor 2025 10:59
- Shpërndaje në:
Sekretari amerikan i Shtetit, Marco Rubio, ka thënë se lëvizja e Knessetit izraelit drejt aneksimit të Bregut Perëndimor do të kërcënonte planin e presidentit, Donald Trump për t'i dhënë fund konfliktit në Gazë, i cili deri më tani ka prodhuar një armëpushim të paqëndrueshëm.
“Padyshim që mendoj se presidenti e ka bërë të qartë se kjo nuk është diçka që ne do ta mbështesnim tani, dhe ne mendojmë se kjo është potencialisht kërcënuese për marrëveshjen e paqes", u ka thënë Rubio gazetarëve të mërkurën vonë para se të nisej për në Izrael.
Vizita e Rubios në Izrael, e njoftuar nga Departamenti i Shtetit të mërkurën, është e fundit nga një zyrtar i lartë amerikan që kërkon të mbajë gjallë armëpushimin e brishtë midis Izraelit dhe grupit militant palestinez Hamas.
Zëvendëspresidenti i SHBA-së, JD Vance, ka mbërritur në Izrael këtë javë dhe është takuar me kryeministrin izraelit, Benjamin Netanyahu të mërkurën. Ai do të takohet me ministrin e Mbrojtjes, Israel Katz, dhe ministrin e Çështjeve Strategjike, Ron Dermer, të enjten para se të niset.
Departamenti i Shtetit ka thënë se Rubio po qëndronte në Izrael për të mbështetur zbatimin e planit 20-pikësh të Trumpit për t'i dhënë fund luftës në Gazë.
Një projektligj që zbaton ligjin izraelit në Bregun Perëndimor të pushtuar, një veprim i barabartë me aneksimin e tokës që palestinezët duan për një shtet, arriti miratimin paraprak nga parlamenti i Izraelit të mërkurën. Rreth 700,000 kolonë izraelitë jetojnë në vendbanime në të gjithë Bregun Perëndimor të pushtuar nga Izraeli. Kombet e Bashkuara dhe pjesa më e madhe e bashkësisë ndërkombëtare i konsiderojnë këto vendbanime të paligjshme sipas të drejtës ndërkombëtare.
Megjithatë, qeveria e Izraelit citon lidhje biblike dhe historike me Bregun Perëndimor, territor që e konsideron të diskutueshëm, dhe kundërshton krijimin e një shteti palestinez.
Vendbanimet janë një çështje tensionesh që për dekada është parë si një pengesë e madhe për paqen në Lindjen e Mesme.
Vota ishte e para nga katër të nevojshme për të miratuar ligjin dhe përkoi me vizitën e Vance në Izrael, një muaj pasi presidenti Donald Trump tha se nuk do ta lejonte Izraelin të aneksonte Bregun Perëndimor.
Partia Likud e Netanyahut nuk e mbështeti legjislacionin, i cili u propozua nga ligjvënës jashtë koalicionit të tij qeverisës dhe u miratua me 25 vota pro dhe 24 kundër nga 120 ligjvënës. Një projektligj i dytë nga një parti opozitare që propozonte aneksimin e vendbanimit Maale Adumim pranë Jerusalemit u miratua me 31 vota pro dhe 9 kundër.