Presidenti rus, Vladimir Putin, dhe ministri i Jashtëm turk, Hakan Fidan, kanë diskutuar rreth përpjekjeve për t’i dhënë fund luftës në Ukrainë dhe zhvillimeve të reja që i pasuan bisedimet e drejtpërdrejta ndërmjet delegacionit të Rusisë dhe Ukrainës në Stamboll ditë më parë, ka bërë të ditur një burim për Reuters.
Kryediplomati turk është në vizitë dyditore në Moskë, ku burimi i Reutersit bëri të ditur se ai u takua të hënën me Putinin dhe po ashtu me udhëheqësin e delegacionit rus, Vladimir Medinsky. Fidan do të takohet gjithashtu me homologun e tij rus, Sergey Lavrov, gjatë të martës (sot).
Përderisa asnjë afat kohor ose vendndodhje nuk është konfirmuar ende për bisedimet e ardhshme mes Rusisë dhe Ukrainës, pala turke ka përsëritur në vazhdimësi se është e gatshme t’i organizojë prapë ato.
Delegatët nga Moska dhe Kievi u takuan në Stamboll para dy jave, për herën e parë që nga marsi i vitit 2022, një muaj pasi Rusia kishte filluar pushtimin në shkallë të plotë të Ukrainës. Si përfundim, s’pati asnjë dakordim për armëpushim të plotë e pa kushte, porse palët u pajtuan që të shkëmbejnë nga 1,000 të burgosur të luftës.
Në kuadër të takimit mes tyre, Putini dhe Fidani diskutuan mbi “nismat e ndërmarra së fundmi për t’i dhënë fund luftës mes Rusisë dhe Ukrainës, dhe zhvillimeve që i pasuan negociatat e mbajtura në Stamboll”.
Çështjet në sferën ekonomike dhe energjetike u diskutuan po ashtu, ka shtuar burimi i Reuters.
Para mbajtjes së takimit, burimi pati bërë të ditur se Fidani do të ritheksonte ofertën e Ankarasë zyrtare për mbajtjen e bisedimeve të reja në territorin turk dhe për të vazhduar me rolin ndërmjetësues në bisedime.
Fidan pritet të udhëtojë drejt kryeqytetit ukrainas të Kievit gjatë javës për t’u takuar me zyrtarë ukrainas.
Nga ana tjetër, burimet ruse kanë raportuar se Turqia, Emiratet e Bashkuara Arabe, Arabia Saudite, Katari e Omani shihen si “vende potencialisht të përshtatshme” për zhvillimin e bisedimeve të reja.
Lavrov sugjeron se Stambolli mund të jetë vendtakimi për rundin e dytë të bisedimeve Rusi-Ukrainë
Photo: Associated Press
Ministri i Punëve të Jashtme i Rusisë, Sergey Lavrov, ka thënë të martën se qyteti i Stambollit mund të jetë vendtakim për rundin e dytë të negociatave direkte mes Moskës dhe Kievit, në mënyrë që të arrihet një marrëveshje për luftën në Ukrainë, ka raportuar agjencia e lajmeve Anadolu.
“Sa i përket rundit të dytë të negociatave ndërmjet Rusisë dhe Ukrainës, nëse më pyesni mua, përsëri do t’iu besoja miqve turq. Stambolli është shumë i mirë”, ka thënë Lavrov gjatë konferencës së përbashkët për shtyp me homologun e tij turk Hakan Fidan, në Moskë.
Turqia luajti rol ndërmjetësues në negociatat e para mes Rusisë dhe Ukrainës që prej fillimit të luftës në vitin 2022, që u zhvilluan më datë 16 maj në qytetin e Stambollit, ku të dyja palët u pajtuan për shkëmbimin e rreth 1000 të burgosurve të luftës nga secila anë dhe për të vazhduar bisedimet e armëpushimit.
Homologët u takuan në ditën e dytë të vizitës së Fidanit në Moskë, pas takimeve të tij të një dite më parë me liderin e delegacionit rus në negociatat me Ukrainën, Vladimir Medinsky, dhe po ashtu me presidentin rus, Vladimir Putin.
Në kuadër të konferencës, kryediplomati turk ka shprehur gatishmërinë e vendit të tij për bisedime dhe kumtoi mbështetjen e presidentit turk, Recep Tayyip Erdogan për procesin e paqes.
