Putini akuzon sabotuesit ukrainas për sulme në Rusi

Presidenti rus, Vladimir Putin, ka fajësuar Ukrainën për kalim të kufirit dhe inkursion mbi civilë, duke përfshirë edhe fëmijë. Në anën tjetër, Ukraina ka mohuar këto pretendime duke i cilësuar si justifikim që Rusia po përdor për shtimin e sulmeve të saj.

Kremlini akuzoi të enjten sabotuesit ukrainas se kaluan në Rusinë perëndimore dhe qëlluan mbi fshatarët. Ukraina e mohoi pretendimin dhe paralajmëroi se Moska mund t'i përdorte akuzat për të justifikuar shtimin e sulmeve të saj në luftën e vazhdueshme.

Rrethanat e sakta të sulmit të raportuar në rajonin Bryansk ishin të paqarta, siç ishte edhe qëllimi strategjik i një sulmi të tillë. Guvernatori rajonal tha se dy civilë u vranë.

Nëse konfirmohet, do të ishte një tjetër tregues pas sulmeve me dron në fillim të kësaj jave se Kievi mund të intensifikojë presionin kundër Moskës duke ekspozuar dobësitë mbrojtëse ruse, duke vënë në siklet Kremlinin dhe duke mbjellë shqetësim mes civilëve rusë.

Presidenti rus, Vladimir Putin, fajësoi “terroristët” ukrainas për inkursionin, duke pretenduar se ata qëllimisht shënjestruan civilë, duke përfshirë fëmijë në “një sulm tjetër terrorist dhe krim të radhës”.

“Ata depërtuan në zonën pranë kufirit dhe hapën zjarr mbi civilët”, tha Putini gjatë një video-konference. “Ata panë një automjet civil me civilë, me fëmijë në të dhe qëlluan mbi ta”.

Inkursioni i supozuar erdhi vetëm disa ditë pasi Putini urdhëroi Shërbimin Federal të Sigurisë që të forcojë kontrollet në kufirin e Rusisë me Ukrainën.

Ndërsa analistët rusë të luftës kanë shprehur shqetësimin me atë që ata e shohin si hezitimin e Putinit për të shpallur ligjin ushtarak dhe për të nisur një mobilizim gjithëpërfshirës të ushtarëve, komentet e liderit rus të enjten nuk duket se sinjalizojnë ndonjë lëvizje të tillë.

Pretendimet e Putinit

Putini fajësoi për sulmin “neonazistët” dhe tha se konfirmoi se Rusia bëri gjënë e duhur duke pushtuar Ukrainën. “E përsëris sërish: Ata nuk do të kenë sukses dhe ne do të përfundojmë duke i zmbrapsur jashtë”, tha ai.

Kur ai urdhëroi pushtimin, lideri rus u zotua të "denazifikonte" Ukrainën, duke pretenduar në mënyrë të rreme se grupet radikale neonaziste dominojnë vendin e udhëhequr nga një president hebre. Kievi dhe aleatët e tij perëndimorë e hodhën poshtë pohimin e tij si një mbulesë false për një akt të paprovokuar agresioni.

Përfaqësuesi i inteligjencës ushtarake të Ukrainës, Andrii Cherniak, i pa pretendimet ruse si provë se Moska po përballet me një kryengritje mes njerëzve të saj të pakënaqur.

“Kjo është bërë nga rusët; Ukraina nuk ka asnjë lidhje me të”, tha ai për Associated Press.

Një grup që e quan veten Trupa Vullnetare Ruse pretendoi se kaloi kufirin me Rusinë në një video që u kërkoi gjithashtu rusëve të rebeloheshin. Deklarata e grupit nuk shpjegoi se çfarë veprimesh ndërmori ose çfarë objektivash specifike donte të arrinte.

Trupa Vullnetare Ruse e përshkroi veten si "një formacion vullnetar në Forcat e Armatosura të Ukrainës". Dihet pak për grupin dhe nuk ishte menjëherë e qartë nëse ka ndonjë lidhje me ushtrinë ukrainase.

Grupi u themelua në gusht dhe përbëhet kryesisht nga ekstremistë rusë të ekstremit të djathtë anti-Putin, të cilët kanë lidhje me grupet e ekstremit të djathtë ukrainas, sipas Michael Colborne, një studiues për uebsajtin investigativ Bellingcat.

Colborne tha në Twitter se inteligjenca ushtarake ukrainase "me shumë gjasa" e miratoi inkursionin.

Këshilltari presidencial ukrainas, Mykhailo Podolyak, i përshkroi pretendimet ruse si "një provokim klasik të qëllimshëm".

Rusia “dëshiron të trembë popullin e saj për të justifikuar sulmin ndaj një vendi tjetër (dhe) varfërinë në rritje pas vitit të luftës”, shkroi ai në Twitter, duke sugjeruar se partizanët rusë qëndronin pas asaj që ndodhi në Bryansk.

Guvernatori i Bryanskut, Alexander Bogomaz, tha se sulmuesit vranë dy civilë dhe plagosën një fëmijë në fshatin Lyubechane.

Shërbimi Federal i Sigurisë i Rusisë tha se veproi së bashku me ushtrinë për të "eliminuar nacionalistët e armatosur ukrainas që shkelën kufirin shtetëror". Agjencia pretendoi më vonë se sulmuesit ishin shtyrë përsëri në Ukrainë "ku mbi ta u shkaktua një sulm masiv artilerie". Nuk ishte e mundur të verifikohej pretendimi.

Putini anuloi një udhëtim të planifikuar në Rusinë jugore për shkak të sulmit. Ai do të kryesojë një takim javor të Këshillit të Sigurimit rus të premten.

I pyetur nga gazetarët nëse aktiviteti mund të garantojë një ndryshim në statusin e konfliktit, zëdhënësi i Kremlinit, Dmitry Peskov tha: "Nuk mund të them për momentin".

Bastisja në rajonin Bryansk pasoi një valë sulmesh me dron. Të martën, dronët që Kremlini tha se ishin nisur nga Ukraina, fluturuan thellë brenda territorit rus, duke përfshirë një që arriti 100 kilometra nga Moska. Ministria ruse e Mbrojtjes tha gjithashtu të mërkurën se ushtria zmbrapsi një sulm me dron në Krime.

Në qytetin jugor të Ukrainës, Zaporizhzhia, tre persona u vranë dhe gjashtë të tjerë u plagosën herët të enjten kur një raketë ruse goditi një ndërtesë apartamentesh pesëkatëshe, duke shkatërruar disa kate.

Një sulm me dron rus goditi njerëzit që qëndronin në radhë për ndihmë humanitare në një fshat në rajonin Kherson të Ukrainës jugore, duke plagosur nëntë persona, përfshirë një 16-vjeçar, tha administrata rajonale.

Presidenti ukrainas Volodymyr Zelenskyy tha se Rusia “do që ta kthejë çdo ditë për popullin tonë në një ditë terrori”, duke shtuar se “e keqja nuk do të mbretërojë në tokën tonë”.

Artileria ruse, dronët dhe raketat kanë goditur zonat e kontrolluara nga Ukraina në jug dhe lindje të vendit për muaj të tërë. Moska mohon të ketë synuar objektiva civilë, por granatimet e saj pa dallim kanë shkaktuar shkatërrime të mëdha në qendrat urbane.

Lufta u ngadalësua kryesisht në një ngërç të rëndë gjatë muajve të dimrit, megjithëse një betejë e ashpër vazhdoi për kontrollin e Bakhmutit, një bastion kyç lindor ku zyrtarët ukrainas thonë se mund të tërhiqen strategjikisht.

Shtabi i përgjithshëm i ushtrisë ukrainase raportoi se forcat ruse "vazhdojnë të avancojnë dhe të sulmojnë qytetin", por trupat e Kievit zmbrapsën disa nga sulmet. Marrja e qytetit jo vetëm që do t'u jepte luftëtarëve rusë një përfitim të rrallë në fushën e betejës pas disa muajsh pengesa, por mund të prishte linjat e furnizimit të Ukrainës dhe të lejonte forcat e Kremlinit të vazhdojnë drejt bastioneve të tjera të Ukrainës në Donetsk.

Në zhvillime të tjera, Sekretari i Shtetit i SHBA-së, Antony Blinken dhe Ministri i Jashtëm rus, Sergey Lavrov biseduan shkurtimisht të enjten në një takim të diplomatëve të lartë nga G-20-a. Ky ishte takimi i parë i nivelit të lartë në disa muaj midis Rusisë dhe SHBA-së.

Një zyrtar i lartë amerikan, i cili foli me gazetarët në kushte anonimiteti për të diskutuar bisedën private, tha se Blinkeni kishte "çaktivizuar" Lavrovin nga çdo ide se mbështetja e SHBA-së për Ukrainën është e lëkundur.

Përktheu: Forca Jashari