Putini akuzon Perëndimin se po e shtyn Rusinë drejt "vijave të kuqe"

Presidenti rus, Vladimir Putin ka akuzuar Perëndimin të hënën, se po e shtyn Rusinë drejt “linjave të kuqe” – situatë të cilën e ka bërë të qartë publikisht se nuk do ta tolerojë – dhe ka thënë se Moska është detyruar të përgjigjet.

Putini ka thënë në një mbledhje të zyrtarëve të mbrojtjes se Rusia po vëzhgon me shqetësim zhvillimet në Shtetet e Bashkuara të Amerikës dhe dërgimet potenciale të raketave me rreze të shkurtër dhe të mesme në Ukrainë, raporton Reuters.

Ai ka thënë se Rusia do t’i hiqte të gjitha kufizimet e veta vullnetare të dërgimit e raketave ruse, nëse SHBA-ja veç dërgon raketa të tilla.

Putni, i cili ka thënë se forcat ruse në Ukrainë kanë marrë nën kontroll 189 vendbanime deri më tani, ka thënë se armët bërthamore të Rusisë janë atje për parandalim të ndonjë sulmi.