-
Përktheu:
Flutura Gashi-Mehmeti
- 15 nëntor 2026 17:28
- Shpërndaje në:
Qindra mijëra qytetarë protestuan të dielën në Pragë kundër planit të qeverisë së miliarderit çek, Andrej Babis, për të ndryshuar mënyrën e financimit të transmetuesve publikë. Protestuesit paralajmëruan se kjo nismë mund të dëmtojë pavarësinë e mediave dhe demokracinë në vend.
Protesta masive u zhvillua në parkun Letna të kryeqytetit, ku turma të mëdha qytetarësh kishin organizuar demonstrata që nxitën Revolucionin e Kadifenjtë të vitit 1989, i cili i dha fund më shumë se 40 vjetëve të komunizmit në vend.
Sipas Mikulas Minar, organizatorit kryesor nga grupi “Një milion momente për demokracinë”, në protestën e zhvilluar vetëm dy ditë para përvjetorit të demonstratave të vitit 1989 morën pjesë rreth 350 mijë persona.
Protestuesit kërkuan që qeveria të tërhiqte planin e saj, ndërsa shprehën shqetësimin se Babis dhe partnerët e tij të koalicionit përbëjnë një kërcënim për demokracinë.
Sipas planit, radioja dhe televizioni publik i vendit do të financoheshin nga buxheti i shtetit dhe jo më përmes sistemit aktual të pagesave të rregullta nga individët, familjet dhe bizneset.
Mediat do të merrnin rreth 15 për qind më pak fonde sesa aktualisht, gjë që mund të çonte në shkurtimin e vendeve të punës, kufizimin e prodhimit dhe anulimin e programeve.
Kritikët thonë se kjo reformë do t'i jepte koalicionit trepartiak mundësinë për të marrë kontrollin mbi mediat, ngjashëm me atë që ndodhi nën qeveritë populiste në Sllovaki, gjatë drejtimit të kryeministrit Robert Fico, dhe në Hungari, përpara se ish-kryeministri Viktor Orban të largohej nga pushteti në prill.
Liria e medias dhe sundimi i ligjit në Republikën Çeke u diskutuan të mërkurën edhe në Parlamentin Evropian.
Komisioneri i BE-së për Drejtësinë, Michael McGrath, tha se legjislacioni kombëtar duhet të garantojë që mediat e shërbimit publik të mbështeten në një sistem financimi të bazuar në kritere transparente dhe objektive, i cili siguron burime financiare "të mjaftueshme, të qëndrueshme dhe të parashikueshme".