Përpjekjet e pushtetit për ta larguar nga skena politike kundërshtarin e Erdoganit

Kritikët e qeverisë e kanë cilësuar procesin gjyqësor si përpjekje për t’ia pamundësuar kryebashkiakut të njohur të garojë kundër Erdoganit në zgjedhjet presidenciale dhe parlamentare që pritet të mbahen në qershorin e vitit 2023. Në rast se shpallet fajtor, Imamoglu mund të humbë postin e kryebashkiakut dhe të zëvendësohet me dikë që është i afërt me partinë e Erdoganit.

Prokuroria turke ka përsëritur kërkesën të premten që kryebashkiaku i Stambollit të dënohet nën akuzat për fyerjen e anëtarëve të Këshillit Suprem të Zgjedhjeve në Turqi.

Kërkesa është bërë në seancën e tretë dëgjimore në përpjekje për ta larguar nga skena politike kundërshtarin më të madh të presidentit Recep Tayyip Erdogan.

Kryebashkiaku i qytetit të Stambollit, Ekrem Imamoglu, anëtar i Partisë Republikane në opozitë, përballet me katër vjet burgim në rast se shpallet fajtor dhe mund t’i pamundësohet mbajtja e pozitës. Imamoglu ishte zgjedhur prijës i qytetit më të madh të Turqisë në marsin e vitit 2019. Fitorja e tij ishte lëkundje e partisë së Erdoganit, e cila kishte kontrolluar Stambollin për çerekshekulli. Partia e Erdoganit kishte bërë përpjekje që të zhbënte rezultatin e zgjedhjeve duke akuzuar për parregullsi. Sfidimi i rezultateve rezultoi në përsëritje të zgjedhjeve pak muaj më vonë. Imamoglu fitoi përsëri – kësaj here me shumicë.

Gjykimi i tij është i bazuar nën akuzat se ai ka fyer anëtarët e këshillit elektoral kur zgjedhjet e anuluara i cilësoi si budallallëk më 4 nëntor të vitit 2019.

Kryebashkiaku i Stambollit ka mohuar akuzat për fyerje të anëtarëve të Këshillit duke insistuar se fjalët e tij ishin reagim ndaj ministri të Brendshëm, Suleyman Soylu, që e kishte quajtur “budalla” dhe e kishte akuzuar Imamoglun për kritikat ndaj Turqisë gjatë vizitës së tij në Parlamentin Evropian.

Gulsah Ince, gazetare e Fox TV për Turqinë, ka dëshmuar si dëshmitare e mbrojtjes në seancën e së premtes. Ajo ka thënë në gjykatë se Imamoglu kishte deklaruar pasi ajo e kishte pyetur për reagim pasi Soylu e kishte quajtur budalla, kanë raportuar mediat turke të premten.

Një tjetër kërkesë për gjykatën që të dëgjojë edhe dy dëshmitarë të tjerë të mbrojtjes është refuzuar.

I pyetur për argumentin e tij përfundimtar në seancën gjyqësore, prokurori ka përsëritur kërkesën e tij se Imamoglu duhet të akuzohet, të dënohet dhe t’i pamundësohet mbajtja e postit të kryetarit.

Gjykimi është shtyrë deri më 14 dhjetor me qëllim që t’u jepet kohë avokatëve të Imamoglut që të përgatisin argumentet e tyre përfundimtare dhe për autoritetet që të rishikojnë kërkesën e tyre që paneli i gjyqtarëve të shkarkohet nën akuzat për njëanshmëri.

Kritikët e qeverisë e kanë cilësuar procesin gjyqësor si përpjekje për t’ia pamundësuar kryebashkiakut të njohur të garojë kundër Erdoganit në zgjedhjet presidenciale dhe parlamentare që pritet të mbahen në qershorin e vitit 2023.

Në rast se shpallet fajtor, Imamoglu mund të humbë postin e kryebashkiakut dhe të zëvendësohet me dikë që është i afërt me partinë e Erdoganit.

Imamoglu, i cili nuk mori pjesën në seancën dëgjimore, u ka thënë gazetarëve se ishte i befasuar dhe i pikëlluar me kërkesën e prokurorit.

“Prisja që procesi të mbyllej në fund të kësaj dite”, ka thënë ai. “Lus Zotin që të mbrojë shtetin tonë dhe njerëzit nga e keqja, nga njerëzit që nuk kanë ndërgjegje, që nuk kanë moral dhe drejtësi”.