Pasi hodhën supë mbi pikturën e mirënjohur të artistit Leonardo DaVinci, Mona Liza, aktivistët e ndryshimeve klimatike, të shtunën, kanë hedhur supë mbi pikturën e Claude Monet, “Le Printemps” raporton “NDTV”.
Vepra e vitit 1872, e cila ndodhet në muzeun “Beaux Arts”, në qytetin Dijon të Francës, është sulmuar nga aktivistët e “Riposte Alimentaire”.
Vepra ishte e mbrojtur me xham, por drejtuesit e muzeut kanë thënë se duhet bërë restaurim dhe kontrollim më i detajuar për të kuptuar se a është dëmtuar piktura.
Drejtuesit e muzeut gjithashtu kanë deklaruar se do të ankohen për vandalizëm, duke shtuar se dy nga aktivistët janë arrestuar.
Një anëtare e “Riposte Alimentair”, ka thënë se duhet të veprohet sa më shpejt, në mënyrë që të mos bëhet vonë për ta shpëtuar planetin nga ndryshimet klimatike.
“Ne e duam artin, por artistët e së ardhmes nuk do të kenë mbi çka të pikturojnë, sepse planeti po digjet”, ka thënë ajo.
Ngjarja ishte e ngjashme me atë që ndodhi në muzeun “Louvre” në Paris, kur nga po i njëjti grup aktivistësh u sulmua me “supë” Mona Liza.
Kjo nuk është hera e parë që sulmohet një vepër e artistit Monet, pasi që në vitin 2022, një grup protestuesish gjermanë hodhën pure mbi veprën e mbrojtur nga xhami “Les Meules”, që gjendet në një muze në Potsdam.
