Parlamenti gjerman dëgjon sot propozimet për ndryshim të ligjeve të azilit dhe emigracionit

Friedrich Merz, i cili pritet të bëhet kancelari i ardhshëm gjerman, do të sjellë të mërkurën para parlamentit propozime për ndryshimin rrënjësor të ligjeve të azilit dhe imigracionit, edhe nëse ato përfundojnë duke u miratuar me mbështetjen e partisë së ekstremit të djathtë “Alternativa për Gjermaninë” (AfD).

Merz është akuzuar se ka ndryshuar pozicionin e tij kundër partisë së ekstremit të djathtë me ndryshimin e propozuar të ligjit, i cili synon të rritë në mënyrë dramatike numrin e dëbimeve, raporton The Guardian.

Propozimet përfshijnë mbylljen efektive të kufijve tokësorë gjermanë ndaj migrimit të parregullt dhe lejimin e policisë federale të kërkojë urdhër-arreste për njerëzit që nuk kanë të drejtën ligjore për të qëndruar në Gjermani. Kritikët thonë se propozimet mund të shkelin ligjin evropian.

Ndryshimi i politikës vjen pas një sulmi në Aschaffenburg javën e kaluar, në të cilin një fëmijë dyvjeçar dhe një burrë 41-vjeçar u goditën me thikë për vdekje nga një azilkërkues nga Afganistani, i cili ishte planifikuar të dëbohej.

Lidhur me sulmin pritet të flasë të mërkurën edhe kancelari Scholz.