Papa Françesku u ka kërkuar hungarezëve që të “hapin dyert” për emigrantët.
Duke folur në një meshë të hapur në kryeqytetin e Budapestit, Papa tha se ishte “e trishtueshme dhe e dhimbshme” të shihje dyer të mbyllura për njerëzit që “nuk ishin si ne”.
Deri në 100,000 njerëz morën pjesë në meshë, përfshirë kryeministrin Viktor Orban.
Orban ka kritikuar migrimin, duke ndërtuar një gardh kufitar me tela me gjemba për të ndaluar emigrantët të kalojnë në Hungari.
Duke iu drejtuar turmës pranë ndërtesës së parlamentit hungarez të dielën, Papa Françesku iu lut të gjithëve - përfshirë “ata me përgjegjësi politike dhe sociale” - të jenë më të hapur.
Ai po fliste për “dyert e mbyllura të egoizmit tonë ndaj të tjerëve... dyert që i mbyllim ndaj atyre që janë të huaj apo ndryshe nga ne, ndaj emigrantëve apo të varfërve”.
Edhe
Papa Françesku falënderon hungarezët për pritjen e ukrainasve
Gjatë meshës, Papa argjentinas, 86 vjeç, iu referua gjithashtu pushtimit të plotë të Ukrainës nga Rusia, i nisur në shkurt 2022.
Ai u lut për “popullin ukrainas të rrethuar dhe popullin rus” dhe për “një të ardhme që jep shpresë, jo luftë”.
