Mos e minoni marrëveshjen për armëpushim në Gaza, paralajmëron Bideni

Presidenti i Shteteve të Bashkuara të Amerikës, Joe Biden, ka paralajmëruar palët e përfshira në negociata për një marrëveshje të mundshme armëpushimi në Gaza që të mos i minojnë përpjekjet.

Bideni ka deklaruar se “jemi më afër se kurrë” armëpushimit pas raundit të fundit të negociatave, por një zyrtar i lartë i Hamasit ka shprehur skepticizëm.

Ai po ashtu ka njoftuar se do ta dërgojë Sekretarin e Shtetit, Antony Blinken, në Izrael për të vazhduar “përpjekjet intensive për ta përfunduar marrëveshjen”, raportoi BBC.

Deklaratat e tij vijnë pas një deklarate të përbashkët nga SHBA-ja, Katari dhe Egjipti – se ata kanë paraqitur një propozim për një armëpushim dhe marrëveshje për lirimin e pengjeve që “ngushton boshllëqet” mes Izraelit dhe Hamasit.

Çfarëdo shenje progresi në bisedimet në Katar vlerësohet si esenciale nga qeveritë e dëshpëruara ta shmangin që lufta në Gaza të shndërrohet në konflikt të gjerë rajonal.

Ndërmjetësuesit kanë thënë se diskutimet e dy ditëve të fundit për armëpushim kanë qenë “serioze, konstruktive dhe të zhvilluara në atmosferë pozitive”.

Edhe Botë 27 nën 2024 Biden: SHBA-ja do të rikthejë përpjekjet për armëpushim në Gaza

Ekipet teknike priten të vazhdojnë të punojnë në ditët në vijim mbi detajet se si të zbatohen kushtet e propozuara para se zyrtarët qeveritarë të takohen sërish në Kajro.

Bideni ka theksuar se ka folur ndaras me liderët e Katarit dhe Egjiptit, të cilët kanë shprehur “mbështetje të fuqishme” për propozimin.