Askush nuk di më shumë për marrëdhënien mes Donald Trumpit dhe Jeffrey Epsteinit sesa gazetari Michael Wolff. Në një intervistë për gazetën gjermane “Frankfurter Allgemeine Zeitung”, ai rrëfen se çfarë zbulimesh të tjera mund të priten.
Në një intervistë ekskluzive për gazetën gjermane “Frankfurter Allgemeine Zeitung” (FAZ), gazetari amerikan Michael Wolff, i njohur për librat e tij mbi Donald Trumpin, flet gjerësisht për marrëdhënien e ndërlikuar dhe të errët mes presidentit amerikan dhe Jeffrey Epstein, milioneri i diskredituar i cili u vetëvra në burg në vitin 2019 ndërsa priste gjykimin për trafikim seksual të të miturve.
Wolff ka zhvilluar dhjetëra orë intervista me Epsteinin midis viteve 2015 dhe 2017, pas dënimit të tij të parë për prostitucion me të mitura. Në to, Epstein flet hapur për miqësinë e tij të ngushtë dhe shumëvjeçare me Trumpin – një marrëdhënie që, sipas Wolff, nuk është trajtuar seriozisht nga mediat tradicionale, të cilat ishin të rezervuara për shkak të natyrës së ndjeshme të çështjes dhe pranisë së teorive konspirative.
Sipas Wolffit, Epstein dhe Trump ishin më shumë se miq të zakonshëm – ata ndanin një obsesion të përbashkët: gratë e reja, veçanërisht modelet. Kjo lidhje ishte, sipas gazetarit, thelbësore për jetën e të dyve, një stil jetese i përqendruar te pushteti, paratë dhe femrat e reja, i cili më vonë e çoi Epsteinin drejt rrënimit – dhe mund të ndriçojë edhe anët më të errëta të karakterit të Trumpit.
Epstein e përshkruante Trumpin si njeri “pa asnjë skrupull”, çka është domethënëse, po të kihet parasysh që vetë Epstein nuk njihej për ndonjë moral të lartë. Sipas Wolffit, materiali që ai zotëron – mbi 100 orë regjistrime – nuk përmban deklarata bombastike, por ofron një pasqyrë të thellë mbi natyrën dhe thellësinë e lidhjes Trump–Epstein dhe obsesionet e tyre të përbashkëta. Në këtë kontekst, “modelet” – shpesh vajza adoleshente në vitet ’80 dhe ’90 – ishin një simbol i kulturës së pushtetit mashkullor të kohës.
Gazetari e portretizon Epsteinin si një figurë të ndërlikuar, shumë më tepër se thjesht një abuzues seksual: një njeri me një rrjet të gjerë dhe ndikim të pazakontë mbi të pasurit dhe të fuqishmit. Pretendimet se ai i shantazhonte këta njerëz, Wolff i quan absurde – ata shkonin te ai me dëshirë, për kontaktet, atmosferën dhe mundësitë e pushtetit që ai u ofronte.
Gjatë kohës që qëndroi në rezidencën luksoze të Epsteinit në Manhattan, Wolff thotë se pa shumë nga figurat e mëdha të jetës publike amerikane, përfshirë Bill Gatesin dhe politikanë të fuqishëm, por nuk jep emra të rinj. Lidhja e Epsteinit me Steve Bannonin, një tjetër figurë kyçe e orbitës së Trumpit, ishte gjithashtu e thellë. Sipas Wolffit, pas Epsteinit, Bannon ishte burimi më i rëndësishëm për të kuptuar Trumpin.
Megjithëse pjesë të këtyre intervistave janë publikuar në bashkëpunim me “The Daily Beast” para zgjedhjeve të fundit presidenciale, Wolff thotë se askush nuk ishte i interesuar në atë kohë për t’i publikuar të plota – as mediat, as shtëpitë botuese. Sot, me rihapjen e interesit publik dhe hetimeve që përfshijnë edhe vetë Trumpin, gazetari po kërkon mënyrën më të mirë për t’i nxjerrë këto materiale, qoftë në formën e një libri, qoftë përmes një platforme tjetër.
Në intervistë, Wolff thekson edhe cinizmin e skajshëm të Trumpit: një figurë që e solli stilin e vet të shfrenuar nga bota e biznesit në politikë, pa ndryshuar asgjë në mënyrën e të jetuarit. Sipas tij, Trump është mjeshtër i mbijetesës politike dhe ka një aftësi të jashtëzakonshme për t’u shmangur nga çdo skandal, përmes mohimeve të hapura dhe sulmeve ndaj të tjerëve – madje edhe ndaj Barack Obamës, kurse vetë baza e tij politike tani kërkon më shumë përgjigje për lidhjen me Epsteinin.
Megjithatë, Wolff nuk përjashton mundësinë që çështja Epstein të përfshijë edhe figura të tjera të larta politike – përfshirë demokratët – ndonëse ai nënvizon se lidhja e Trumpit me Epsteinin ishte shumë më e gjatë dhe më e ngushtë sesa ajo e Bill Clintonit.
Sipas FAZ, historia mbetet e hapur dhe potencialisht shpërthyese. Pyetja qëndron: a do të jetë ky materiali që më në fund do ta fundosë politikisht Trumpin, apo ai do ta kalojë edhe këtë stuhi siç ka bërë me të tjerat? Wolff nuk ka përgjigje, por mbetet i vendosur që kjo histori duhet të tregohet deri në fund.