Suedia nuk po financon apo armatos organizatat terroriste, ka thënë kryeministrja Magdalena Andersson, në përgjigje të pretendimeve turke se ajo po strehon organizata terroriste.
Turqia po kundërshton ofertat e Suedisë dhe Finlandës për t’u bashkuar me NATO-n, duke i akuzuar dy shtetet për strehimin e anëtarëve të Partisë së Punëtorëve të Kurdistanit, një grup që Turqia e sheh si organizatë terroriste, dhe pasuesve të Fethullah Gulenit, të cilin Ankaraja e akuzon për orkestrimin e një përpjekjeje për grusht-shtetin e vitit 2016, shkruan BBC.
“Ne nuk po u dërgojmë para organizatave terroriste, natyrisht, as ndonjë armë”, ka thënë Andersson në një konferencë shtypi në Stokoholm
Përfaqësuesit e Suedisë dhe Finlandës po takojnë sot zyrtarët turq për të diskutuar aplikimet e tyre për t'u anëtarësuar në NATO.
Ata kanë nevojë për mbështetjen e 30 anëtarëve të NATO-s, por Turqia deri më tani ka kundërshtuar ofertat e tyre.
