Erdogani këmbëngul: Nuk do ta miratojmë pranimin e Suedisë dhe Finlandës në NATO

“Turqia nuk do të miratojë pranimin e Suedisë dhe Finlandës në aleancën e NATO-s derisa këto dy vende të ndërmarrin hapat e nevojshëm siç kemi kërkuar”, ka thënë presidenti turk Recep Tayyip Erdogan pas takimit me kreun e Aleancës, Jens Stoltenberg .

Erdogani ka thënë se lëvizjet e Suedisë dhe Finlandës do të përcaktojnë se sa i shpejtë do të jetë procesi i anëtarësimit dhe kur do të përfundojë, shkruan The Guardian .

Ankaraja ka akuzuar dy vendet nordike se u ofrojnë strehim militantëve kurdë, të cilët Turqia i konsideron terroristë, dhe ka refuzuar të ratifikojë pranimin e dy vendeve në aleancën e NATO-s, pavarësisht nga marrëveshja e arritur në qershor.

Erdogani dhe Stoltenbergu zhvilluan një takim privat të premten në Stamboll, i cili ishte i mbyllur për publikun.

Në maj, Finlanda dhe Suedia hoqën dorë nga neutraliteti i tyre për dekada dhe aplikuan për anëtarësim në NATO pasi Rusia sulmoi Ukrainën.

Edhe Botë 15 mar 2023 Erdogani jep shenja se Turqia do ta shtyjë përpara anëtarësimin e Finlandës në NATO

Erdogani kërcënoi se do të bllokonte procesin e tyre të pranimit dhe kërkoi disa lëshime, por në qershor u arrit një marrëveshje midis Turqisë, Finlandës dhe Suedisë që përfshinte dispozita për ekstradimin dhe shkëmbimin e informacionit të sigurisë.

Kryeministri i ri i Suedisë, Ulf Kristersson, është planifikuar të vizitojë Ankaranë të martën për t'u takuar me Erdoganin dhe Stokholmi shpreson se vizita do të çojë në një ndryshim në qëndrimin e Turqisë.