Erdogani jep shenja se Turqia do ta shtyjë përpara anëtarësimin e Finlandës në NATO

Presidenti turk, Recep Tayyip Erdogan, ka sugjeruar të mërkurën se vendi i tij së shpejti mund ta miratojë aplikimin e Finlandës për t’iu bashkuar NATO-s, duke dhënë mundësinë që ajo t’i bashkohet aleancës ushtarake ndarazi nga Suedia.

Të alarmuara nga pushtimi i Ukrainës vitin e kaluar, Finlanda dhe Suedia braktisën dekada mosangazhim dhe aplikuan për t’iu bashkuar aleancës. Të gjithë 30 anëtarët e NATO-s duhet të aprovojnë aplikimet e tyre, dhe 28 prej tyre i kanë ratifikuar. Vetëm Turqia dhe Hungaria nuk e kanë bërë, raportoi AP. 

Qeveria e Turqisë e akuzon Suedinë se është treguar e butë me grupet terroriste dhe që janë kërcënim, përfshirë ato kurde. Ankaraja megjithatë ka thënë se ka më pak probleme me anëtarësimin e Finlandës.

Pyetur nga gazetarët nëse Turqia do ta aprovojë aplikimin e Finlandës, Erdogani u përgjigj: “Dashtë Zoti, nëse është për të mirë”.

“Ne do ta bëjmë pjesën tonë. Do ta mbajmë premtimin tonë. Do të takohemi të premten me presidentin dhe do ta përmbushim premtimin që kemi dhënë”, ka thënë ai.

Kryeministri suedez, Ulf Kristersson ka thënë se ka pasur indikacione të vazhdueshme në javët e fundit se Turqia është gati të ratifikojë anëtarësimin e Finlandës para Suedisë.