Kryeministri suedez Ulf Kristersson ka mbërritur të martën në Ankara, ku ka takuar presidentin e Turqisë, Recep Tayyip Erdogan, me të cilin ka biseduar për hyrjen e Suedisë në NATO dhe përmbushjen e kërkesave turke gjatë rrugës, shkruan CNN.
Pas takimit, lideri suedez dhe turk mbajtën një konferencë të përbashkët për shtyp dhe kryeministri suedez theksoi se takimi ishte produktiv.
"Unë u bëra kryeministër tre javë më parë. Ne patëm një takim produktiv. Biseduam se si mund të përmirësojmë marrëdhëniet. Gjatë diskutimit prekëm edhe çështjen e terrorizmit. Mesazhi im është i qartë. Ne e kuptojmë se Turqia është e përfshirë në një konflikti afatgjatë me PKK-në. Erdoganit i shpjegohet situata dhe dua të jem i qartë - Suedia e konsideron PKK-në një organizatë terroriste", ka thënë Kristersson.
Më pas ai iu referua kërkesave të Turqisë drejtuar Suedisë dhe Finlandës, të cilat paraqesin një lloj parakushti për miratimin e anëtarësimit në NATO.
"Ne do të përmbushim marrëveshjen që kemi nënshkruar së bashku me Turqinë dhe Finlandën. Qëndrimi ynë është se ne luftojmë kundër terrorizmit. Ne e marrim atë shumë seriozisht. Kemi bërë në masë të madhe atë që është rënë dakord. Suedia do të marrë masa të mëdha në fund të këtij viti, por edhe në fillim të vitit të ardhshëm në luftën kundër terrorizmit”, përfundoi Kristersson.
Edhe
Kryeministri suedez do të takohet me Orbanin për t’i dhënë fund bllokimit të anëtarësimit në NATO
Nga ana tjetër, Erdogani theksoi se takimin e radhës me zyrtarët suedezë do ta zhvillojë në dhjetor.
"Suedia dëshiron anëtarësimin në NATO për sigurinë e saj dhe Turqia dëshiron të shohë Suedinë të bashkëpunojë me Ankaranë për të eliminuar shqetësimet e saj të sigurisë. Organizatat terroriste PKK/PYD/YPG, FETO dhe DHKP-C duhet të parandalohen që të shfrytëzojnë mjedisin demokratik të Suedisë", shtoi Erdogan.
