Komisioni Evropian zhbllokon 10 miliardë euro për Hungarinë

Komisioni Evropian ka njoftuar të mërkurën se do të zhbllokojë rreth 10 miliardë euro të destinuara për Hungarinë, rreth një e treta e shumës totale të ngrirë për shkak të shqetësimeve që lidhen me sundimin e ligjit, raportoi “The Guardian”.

Komisioni argumentoi se Hungaria ka përmbushur në sërë reformash gjyqësore dhe për këtë arsye meriton qasje në një pjesë të financimit sipas meritës.

“Pas një vlerësimi të plotë dhe disa shkëmbimesh me qeverinë hungareze, Komisioni vlerëson se Hungaria ka marrë masat që u zotua të marrë në mënyrë që Komisioni të konsiderojë se kushti i mundësimit të Kartës së të Drejtave Themelore të BE-së është përmbushur në lidhje me pavarësinë gjyqësore”, thuhet në deklaratën e Komisionit.

Kjo do të thotë se një pjesë e financimit të Politikës së Kohezionit nuk do të bllokohet më, dhe për këtë arsye Hungaria mund të fillojë të kërkojë rimbursime deri në rreth 10.2 miliardë euro.

Grupet hungareze të shoqërisë civile që monitorojnë pavarësinë e gjyqësorit thonë se qeveria nuk i ka përmbushur plotësisht kriteret. Dhe një grup prej katër grupesh politike në Parlamentin Evropian – përfshirë Partinë Popullore Evropiane të qendrës së djathtë dhe Socialistët dhe Demokratët – shprehën gjithashtu shqetësimin në një letër drejtuar presidentes së komisionit, Ursula von der Leyen.

Kritikët e lëvizjes së komisionit thonë se ekziston një perceptim se zhbllokimi i fondeve u nxitua për të ndihmuar në bindjen e kryeministrit hungarez, Viktor Orban, që të heqë bllokimin e tij mbi vendimet kyçe të lidhura me Ukrainën.