Kina lehtëson masat pas dy muajve bllokim

Qyteti kinez i Shangait, qendra ekonomike e vendit dhe një qendër tregtare globale, ka lehtësuar kufizimet e COVID-it pas një bllokimi dy-mujor.

Në mesnatë me orën lokale, kufizimet u lehtësuan për të lejuar shumicën e njerëzve të lëvizin lirshëm nëpër qytetin me rreth 25 milionë banorë.

Por të paktën 650.000 banorë do të mbesin të bllokuar në shtëpitë e tyre, shkruan BBC.

Politika e përgjithshme e Kinës për “zero Covid” mbetet në fuqi dhe njerëzit që infektohen me COVID duhet të shkojnë në karantinë ose në spital.

Kontaktet e të infektuarve gjithashtu duhet të karantinohen.

“Kjo është një ditë që ne e kemi ëndërruar për një kohë shumë të gjatë”, u tha gazetarëve zëdhënësja e Qeverisë së Shangaoit, Yin Xin. “Të gjithë kanë sakrifikuar shumë. Kjo ditë ka qenë e fituar me vështirësi dhe ne duhet ta vlerësojmë dhe ta mbrojmë atë, dhe të mirëpresim përsëri Shangain me të cilin jemi njohur dhe na ka munguar”.