Republikani Kevin McCarthy u zgjodh kryetar i Dhomës së Përfaqësuesve në një votim historik pas mesnatës të së shtunës, në rundin e 15-të.
Ai arriti t’i kapërcejë pengesat nga radhët e tij dhe tensionet që vluan pas një jave kaotike që testoi aftësinë e shumicës së re republikane për të qeverisur, raportoi Associated Press të shtunën.
“Babai im më thoshte gjithmonë, ashtu si filloni, ashtu edhe përfundoni”, u tha McCarthy derisa republikanët brohorisnin.
I etur për t'u përballur me presidentin Joe Biden dhe demokratët, ai premtoi thirrje dhe hetime.
“Tani fillon puna e vështirë”, deklaroi ai.
Me një kryetar të zgjedhur, Dhoma më në fund do të jetë në gjendje të fillojë betimin e ligjvënësve të sapozgjedhur të cilët kishin pritur gjatë gjithë javës që dhoma të hapej zyrtarisht dhe të fillonte seanca 2023-2024.
