Ministri izraelit i Financave, Bezalel Smotrich, është zotuar se do të vazhdojë zgjerimin e vendbanimeve në zonën e pushtuar të Bregut Perëndimor, duke sfiduar presionin ndërkombëtar mbi Izraelin për ta ndaluar ndërtimin në tokën që palestinezët e shohin si qenësore për një shtet të pavarur.
Të martën vonë, Smotrichi ka miratuar vendbanimin e ri të quajtur Mishmar Yehuda, në Gush Etzion, grup vendbanimesh hebraike në jug të Jerusalemit dhe ka thënë se do të vazhdojnë punimet për vendbanimet e ardhshme.
“Ne do të vazhdojmë zgjerimin e vendbanimeve përgjatë vendit”, ka thënë ai në një deklaratë, raporton “Reuters”.
Lëvizja vjen disa ditë pasi sekretari amerikan i Shtetit, Antony Blinken, u shpreh se Washingtoni konsideron që vendbanimet hebraike në Bregun Perëndimor janë në mospërputhje me ligjin ndërkombëtar, duke u rikthyer në pozicionin e mbajtur gjatë nga SHBA-ja, qëndrim i ndërruar nga administrata e ish-presidentit Donald Trump.
Ky ndryshim ka sjellë SHBA-në në një linjë me pjesën tjetër të botës, të cilët i konsiderojnë vendbanimet e ndërtuara në territorin e pushtuar nga Izraeli, në luftën e Lindjes së Mesme të vitit 1967, si të paligjshme. Izraeli kundërshton këtë pikëpamje, duke cituar historinë e hebrenjve dhe lidhjet biblike me tokën.
Palestinezët kanë thënë se zgjerimi i vendbanimeve përgjatë Bregut Perëndimor është pjesë e politikës së qëllimshme të Izraelit për të ulur ambiciet për krijimin e një shteti me Jerusalemin Lindor si kryeqytet.
Edhe
Izraeli miraton 19 vendbanime të reja hebraike në Bregun Perëndimor të pushtuar
Javën e kaluar, ministrat izraelitë ranë dakord të mblidhnin një këshill planifikimi për të miratuar ndërtimin e rreth 3,300 shtëpive, vendim të cilin Blinkeni e konsideroi si zhgënjyes për Washingtonin, i cili ka bërë përpjekje për zgjidhje të konflikteve midis Izraelit dhe palestinezëve.
“Kjo është përgjigjja jonë për kombet e botës”, ka thënë Shlomo Ne'eman, bashkiaku i Këshillit të Qarkut Gush Etzion. “Ne do vazhdojmë përpara dhe do ta forcojmë Gush Etzionin me më shumë banorë, shkolla, rrugë dhe kopshte për fëmijë”.
