Izraeli thotë se njëri nga trupat e kthyer nga Hamasi nuk është peng

Ushtria izraelite ka thënë të mërkurën se një nga trupat e dorëzuar nga Hamasi të martën në mbrëmje "nuk përputhet me asnjë nga pengjet".

Ushtria ka njoftuar se konstatimi është bërë pas ekzaminimeve në Institutin Kombëtar të Mjekësisë Ligjore.

"Hamasi është i detyruar të bëjë të gjitha përpjekjet e nevojshme për të kthyer pengjet e vdekura", ka thënë ushtria.

Grupi militant palestinez ka kthyer të hënën 20 pengjet e gjalla dhe trupat e katër të vdekurve.

Ndërkohë të martën, ka kthyer edhe katër trupa të tjerë, pas presionit nga Izraeli se nëse nuk i kthente ato, do të ndalonte hyrjen e ndihmave në Gazë.

Në total ishin 28 pengje që kanë vdekur në robëri, që kur Hamasi i kishte marrë ata gjatë një sulmi në jug të Izraelit, më 7 tetor 2023.