Ushtria izraelite i ka paralajmëruar të shtunën banorët e fshatrave të Libanit afër kufirit me Izraelin, të mos kthehen deri në njoftimin e radhës, një ditë pasi Izraeli ka deklaruar se trupat e tij do të qëndrojnë në jug të Libanit edhe pas së dielës, ka raportuar agjencia e lajmeve “Reuters”.
Armëpushimi i ndërmjetësuar nga SHBA-ja që përfundoi luftën e vitit të kaluar në mes Izraelit dhe Hezbollahut parashihte se forcat izraelite duhej të tërhiqeshin derisa luftëtarët dhe armët e grupit të mbështetur nga Irani të largohen nga jugu dhe të vendoset ushtria libaneze. Marrëveshja ka pasur periudhë 60-ditore dhe përfundon të dielën.
Por të premten Izraeli ka njoftuar se parametrat e armëpushimit nuk janë ndjekur plotësisht nga Libani, që nënkupton qëndrimin e forcave izraelite edhe pas të dielës, pa caktuar se sa gjatë.
Ushtria libaneze ka deklaruar të shtunën se Izraeli po e vonon tërheqjen.
Në njoftim në rrjetin social X, ushtria izraelite ka postuar një hartë që tregon shumë fshatra në jug të Libani duke ua rikujtuar banorëve që u ndalohet të kthehen në shtëpitë e tyre deri në njoftimin e radhës.
“Çdo kush që lëviz në jug të kësaj linje, e vendos veten në rrezik”, ka shkruar ushtria në X. Linja zgjatet nga Shebaa, më pak se dy kilometra nga kufiri në lindje, deri te Mansouri në perëndim – rreth dhjetë kilometra nga kufiri.
Armëpushimi u ka dhënë fund më shumë se një vit luftimesh të cilat ishin nxitur nga lufta në Gazë dhe kulmoi me ofensivë të madhe të ushtrisë izraelite kundër Hezbollahut, e cila zhvendosi më shumë se një milion njerëz në Liban dhe e dobësoi shumë organizatën.
Edhe
Ushtria libaneze dislokohet në një "zonë pilot" pas tërheqjes izraelite
Ushtria izraelite ka shtuar se është duke konfiskuar armë të Hezbollahut dhe po ia shkatërron infrastrukturën.
Shtëpia e Bardhë ka njoftuar të premte, se një zgjatje e shkurtë e armëpushimi është e nevojshme urgjentisht.
Hezbollah, i cili ka pësuar humbje të mëdha gjatë luftës, ka deklaruar të enjten se çdo vonesë në tërheqjen e trupave izraelite do të ishte shkelje e papranueshme e marrëveshjes dhe se është përgjegjësia e shtetit të Libanit të reagojë. Hezbollah ka deklaruar se shteti libanez duhet të përballet me situatën “me të gjitha mënyrat dhe metodat që garantohen me të drejtën ndërkombëtare”.
