Italia kërkon garanci sigurie për trupat italiane në Liban

Kryeministrja italiane, Giorgia Meloni ka kërkuar garantim të sigurisë të martën, për të gjithë trupat italiane të rekrutuara në Liban, ku paqeruajtësit e Organizatës së Kombeve të Bashkuara janë plagosur gjatë konfliktit mes Izraelit dhe Hezbollahut, raporton Reuters.

Italia ka dërguar trupa në misionin paqeruajtës të OKB-së, të njohur si UNIFIL dhe në një mision tjetër të njohur si MIBIL, i cili trajnon forcat e armatosura lokale. Ka mbi 1000 trupa italiane në Forcën e Përkohshme të Kombeve të Bashkuara në Liban.

Këshilli i Sigurisë së OKB-së ka shprehur shqetësime të hënën, pasi disa pozicione të paqeruajtësve të OKB-së janë sulmuar në jug të Libanit dhe u ka kërkuar të gjitha palëve ta respektojnë sigurinë e personelit dhe ambienteve të UNIFIL-it.

“Ne besojmë se qëndrimi i forcave izraelite është plotësisht i pajustifikuar”, ka thënë Meloni, duke e përshkruar si “shkelje të hapur” të rezolutës së OKB-së, për përfundimin e armiqësive midis Hezbollahut dhe Izraelit.

Në një fjalim para Senatit të Italisë, ajo ka thënë se veprimet e Izraelit nuk janë të pranueshme dhe se ia ka shprehur këtë edhe kryeministrit izraelit, Benjamin Netanyahu. Meloni u ka thënë gazetarëve se është duke e konsideruar udhëtimin për në Liban.

Netanyahu ka mohuar se trupat izraelite i kanë shënjestruar qëllimisht paqeruajtësit e UNIFIL-it në Liban dhe ka kërkuar që paqeruajtësit të largohen nga zonat e luftimeve.

Edhe Botë 15 tet 2024 Kombet e Bashkuara refuzojnë kërkesën e Izraelit që të largohen nga Libani jugor

Italia ka protestuar ndaj Izraelit dhe është bashkuar me aleatët për t’i dënuar sulmet ndaj paqeruajtësve.

Meloni ka thënë se Hezbollahu gjithashtu ka shkelur rezolutën e OKB-së dhe kishte kërkuar “ta militarizonte zonën nën juridiksionin e UNIFIL-it”, duke shtuar se Italia dëshironte t’i forconte aftësitë e UNIFIL-it dhe Forcave të Armatosura Libaneze.