Policia federale e Brazilit ka akuzuar ish-presidentin Jair Bolsonaro për “shoqatë kriminale” dhe “falsifikim të të dhënave të tij për vaksinimin anti-COVID”, duke shënuar aktakuzën e parë për liderin e së djathtës ekstreme. Rrethi i tij gjithashtu pritet të përfshihen në aktakuzë, shkruan The Guardian.
Gjykata Supreme të martën lëshoi aktakuzën e policisë që pretendon se Bolsonaro dhe 16 të tjerë kanë futur informacion të rremë në bazën e të dhënave të shëndetit publik për t’u dukur se ish-presidenti, vajza e tij 12-vjeçare dhe disa të afërm të tij kanë marrë vaksinën anti-COVID.
Gjatë pandemisë, Bolsonaro ishte një nga liderët e paktë botërorë që ishte kundër vaksinës, duke shkelur edhe kufizimet e duke inkurajuar shoqërinë ta ndjekë shembullin e tij. Administrata e tij injoroi disa emaile nga kompanitë farmaceutike gjatë kohës së COVID-19.
Zyra e Prokurorit të Përgjithshëm të Brazilit do të ketë fjalën e fundit nëse do ta përdorë aktakuzën e policisë për të ngritur akuza kundër Bolsonaros në Gjykatën Supreme. Është njëra prej disa hetimeve që po zhvillohen kundër Bolsonaros, i cili qeverisi Brazilin midis viteve 2019 dhe 2022.
Por ish-presidenti është i qetë, edhe pse e pranon që nuk e ka marrë vaksinën anti-COVID.
“Është hetim selektiv. Unë jam i qetë, nuk kam borxh asgjë. Bota e di që unë nuk e kam marrë vaksinën”, ka thënë Bolsonaro.
Policia e akuzon Bolsonaron dhe ndihmësit e tij për ndërhyrje në bazën e të dhënave të Ministrisë së Shëndetësisë pak para se të udhëtonte në SHBA në dhjetor të vitit 2022, dy muaj pasi humbi zgjedhjet ndaj Luiz Inacio Lula da Silva.
Edhe
Ish-presidenti brazilian do t’a vuajë në shtëpi dënimin prej 27 vjetësh burgim
Bolsonaro kishte nevojë për certifikatë vaksinimi për të hyrë në SHBA, ku qëndroi për ditët e fundit të mandatit. Dyshohet se e falsifikoi certifikatën.
Nëse dënohet për falsifikim të të dhënave shëndetësore, politikani 68-vjeçar mund të kalojë deri në 12 vjet pas hekurave. Ndërsa dënimi maksimal për akuzën e “shoqatës kriminale” është katër vjet.
Gjykata më e lartë zgjedhore e Brazilit e ka përjashtuar Bolsonaron nga kandidimi deri në vitin 2030, me arsyetimin se abuzoi me pushtetin gjatë fushatës së vitit 2022 dhe hodhi dyshime të pabaza në sistemin elektronik të votimit.
