Paul Whelan, një amerikan i dënuar nga Rusia për spiunazh, është parë në një videoincizim për herë të parë pas tri vjetëve, raporton BBC.
Whelan gjithmonë e ka quajtur veten peng politik.
I arrestuar në vitin 2018 në Moskë, ku kishte udhëtuar në dasmën e një shoku, ish-marinsi amerikan u dënua me 16 vjet burgim.
Qeveria e SHBA-së ka thënë se Whelan është “arrestuar gabimisht”.
Kanali rus “RT” ka bërë një video brenda një kampi të punës. Whelan ka refuzuar të japë intervistë.
Për familjen e tij, në SHBA dhe Kanada, është hera e parë që e shohin atë që nga qershori i vitit 2020, kur BBC-ja incizoi paraqitjen e tij të fundit në një gjykatë në Moskë.
“Është mirë ta shoh atë sërish dhe të shoh se po vazhdon të luftojë, e mbetet i palëkundur”, ka thënë vëllai binjak i Paul Whelanit, Davidi.
Në video shihet Whelan duke u rreshtuar përkrah të burgosurve tjerë në oborrin e burgut, duke qepur rroba në një fabrikë burgu. Më pas shihet në mensë.
Ai më herët i kishte thënë prindërve të tij se po i kërkohet vazhdimisht që të marrë pjesë në “propagandë të Kremlinit”. Në video, ndonëse shihet i relaksuar dhe duke buzëqeshur, ai qartë i thotë se nuk do t’i përgjigjet asnjë pyetje.
Video raportohet se është bërë në maj dhe është publikuar vetëm tash.