Rusia ka liruar një shtetas amerikan 74-vjeçar, i cili ishte burgosur nën akuzat se kishte luftuar në anën e Ukrainës, ndërsa presidenti rus Vladimir Putin u takua me të dërguarin amerikan Steve Witkoff në St. Petersburg për bisedime, transmeton “BBC”.
Hubbard u dërgua në Aeroportin Pulkovo të qytetit, tha Putin gjatë takimit të mbajtur herët të mërkurën.
Presidenti amerikan Donald Trump tha më vonë se ish-mësuesi ishte “duke u kthyer në shtëpi” dhe se “nuk ishte i nevojshëm asnjë ‘shkëmbim’”. Pas lirimit, Witkoff e quajti Putinin humanitar.
Hubbard, i cili në vitin 2024 u dënua me gati shtatë vjet në një koloni penale, u akuzua se kishte shërbyer në një njësi të mbrojtjes në Ukrainën lindore, kur u kap në vitin 2022, pak kohë pas fillimit të pushtimit të plotë të Ukrainës nga Rusia.
CBS News, partneri mediatik amerikan i BBC-së, raportoi se Hubbard kishte qenë në gjendje të keqe shëndetësore dhe pritej të dërgohej me avion në Texas për trajtim.
Witkoff e lavdëroi Putinin për lirimin e Hubbardit.
“Ju flisni shumë për presidentin tim, presidentin Trump, si humanitar – edhe ju jeni humanitar, zoti president, dhe ju përshëndes për këtë. Ju përgëzoj”, tha Witkoff.
Kjo deklaratë shkaktoi reagime të ashpra nga ligjvënësit e Partisë Republikane. Përfaqësuesi Don Bacon shkroi në rrjetet sociale se kjo ishte “një tjetër turpërim”. Senatori John Cornyn tha se Putini “është një vrasës gjakftohtë”.
Hubbard u pa më vonë duke e falënderuar Witkoffin, kur të dy u takuan veçmas. I pranishëm ishte edhe këshilltari financiar i Putinit, Kirill Dmitriev.
Në një reagim në rrjetet sociale, pasi mediat shtetërore ruse raportuan për lirimin, Trump tha se ai kishte ardhur pas një kërkese që ia kishte bërë Putinit “drejtpërdrejt” javën e kaluar.
Në të kaluarën, amerikanët e ndaluar në Rusi kryesisht janë liruar përmes shkëmbimeve të të burgosurve.
Trumpi u duk se mbrojti gjithashtu vendimin e tij të fundit për t’i pezulluar sanksionet ndaj Rusisë, dy ditë para se ato të hynin në fuqi. Ai shkroi se “nëse sanksionet do të ishin vendosur”, negociatat për lirimin e Hubbardit “do të kishin ndaluar plotësisht”.
Departamenti amerikan i Shtetit e kishte klasifikuar më herët Hubbardin, nga Michigani, si person të “ndaluar padrejtësisht”, ndërsa Trump kishte lënë të kuptohej të martën se lirimi i tij mund të ishte i afërt.
“Shihni çfarë do të ndodhë”, u tha Trump gazetarëve. “Ne jemi përqendruar te Hubbard”.
Prokurorët rusë e kishin akuzuar Hubbardin se ishte bashkuar me një njësi ushtarake ukrainase dhe kishte marrë trajnim e armë. Por motra e tij, Patricia Fox Hubbard, i kishte thënë më herët agjencisë Reuters se kjo ishte e pamundur, për shkak të moshës së tij të shtyrë dhe mungesës së interesimit për ushtrinë.
Djali i Hubbardit, Joseph Coleman, i cili është prift ortodoks, tha në një deklaratë se ishte lutur për shumë vite për lirimin e të atit.
“Teksa pres bekimin për ta përqafuar sërish, lirinë e tij nuk e shoh si një fitore politike, por si një dhuratë të mëshirës”, tha Coleman.
Avokati i Hubbardit, Martin De Luca, shkroi të mërkurën në rrjetet sociale: “Rruga drejt paqes është e vështirë, por përfitimet e saj njerëzore nuk duhet të presin deri në arritjen e një marrëveshjeje përfundimtare”.
Zëdhënësi i Putinit, Dmitry Peskov, u tha mediave ruse se zyrtarët amerikanë kishin kërkuar prej një kohe të gjatë nga Rusia lirimin e Hubbardit dhe se Putini kishte vendosur ta lironte për arsye humanitare.
Witkoff, i cili një ditë më parë kishte marrë pjesë në bisedimet me presidentin ukrainas Volodymyr Zelensky në Oslo, i kërkoi gjithashtu Putinit t’i shqyrtonte disa propozime të dakorduara në kryeqytetin norvegjez, përfshirë rifillimin e bisedimeve trepalëshe të paqes me Ukrainën, me synimin për t'i dhënë fund luftës.
Putini nuk ka komentuar publikisht nëse ndonjëri prej propozimeve do të ishte i pranueshëm për Moskën.
Udhëheqësi rus deri më tani i ka refuzuar të gjitha propozimet e Ukrainës dhe aleatëve të saj evropianë për ngrirjen e vijës së gjerë të frontit në pozicionet aktuale dhe nisjen e bisedimeve të paqes.
Ai e falënderoi Putinin për marrëveshjen e arritur me Washingtonin në fillim të këtij muaji për importimin e naftës dizel ruse, duke thënë se Trump ishte “thellësisht mirënjohës” për të.
Dërgesa e parë në kuadër të marrëveshjes do të niset nga Rusia “pas dy deri në tri ditësh”, tha Putini gjatë takimit, sipas agjencisë shtetërore të lajmeve TASS.
Marrëveshja për naftën dizel e zemëroi Zelenskyn dhe shkaktoi përkeqësim të marrëdhënieve, gjatë të cilave Trump pezulloi një sërë sanksionesh ndaj Rusisë dhe tha se kishte ardhur koha që Ukraina të zgjidhte një udhëheqës të ri.
Në prag të zgjedhjeve të mesmandatit në SHBA, në nëntor, Trump është përpjekur gjithashtu t'ua atribuojë sulmeve ukrainase ndaj objekteve energjetike ruse rritjen e çmimeve të karburanteve, të cilat janë rritur që nga fillimi i luftës së udhëhequr nga SHBA-ja kundër Iranit.
Ndërkohë, Kievi e akuzoi Washingtonin se kishte ndërprerë shkëmbimin e informacioneve të inteligjencës për sulmet vdekjeprurëse ruse, duke shkaktuar humbjen e jetëve të ukrainasve – një akuzë që Washingtoni e hodhi poshtë si “skandaloze”. Ukraina pretendoi gjithashtu se një kufizim i papritur i shërbimit të internetit Starshield në operacionet e saj ushtarake ishte bërë qëllimisht.
Presidenti ukrainas tha të martën se shkëmbimi i informacioneve të inteligjencës kishte rifilluar, pas bisedimeve me Witkoffin në Oslo, të cilat një zyrtar amerikan i përshkroi si “konstruktive”.
Teksa bisedimet po zhvilloheshin në St. Petersburg, Zelensky shkroi në rrjetet sociale se “shumëçka varet nga fakti nëse pala amerikane do të mund të dëgjojë sot diçka të re nga Rusia – për paqen dhe jo për vazhdimin e luftës”.
Agjencia shtetërore ruse e lajmeve RIA Novosti raportoi se SHBA-ja dhe Rusia diskutuan rezultatet e bisedimeve në Oslo dhe se Witkoff kishte sjellë dokumente që “përshkruanin qasjet ndaj procesit të paqes”.
Bisedimet në Shën Petersburg zgjatën më shumë se tri orë, raportuan mediat shtetërore ruse.