-
Përktheu:
Flutura Gashi-Mehmeti
- 6 nëntor 2025 09:45
- Shpërndaje në:
Një infermier i kujdesit paliativ në Gjermani është dënuar me burgim të përjetshëm pasi është shpallur fajtor për vrasjen e 10 pacientëve dhe tentativën e vrasjes së 27 të tjerëve.
Prokurorët pretenduan se burri, emri i të cilit nuk është bërë publik, u kishte injektuar pacientëve të tij, kryesisht të moshuar, qetësues ose ilaçe kundër dhimbjeve, në një përpjekje për të lehtësuar ngarkesën e punës gjatë ndërrimeve gjatë natës, raporton BBC.
Veprat penale u kryen midis dhjetorit 2023 dhe majit 2024 në një spital në Wuerselen, në Gjermaninë perëndimore.
Hetuesit raportohet se po hetojnë disa raste të tjera të dyshimta gjatë karrierës së tij.
Sipas agjencisë mediatike Agence France-Presse (AFP), burri i paidentifikuar kishte qenë i punësuar në spitalin në Wuerselen që nga viti 2020, pasi kishte përfunduar trajnimin si profesionist i infermierisë në vitin 2007.
Prokurorët i thanë një gjykate në Aachen se ai tregonte "irritacion" dhe mungesë empatie ndaj pacientëve që kërkonin një nivel më të lartë kujdesi dhe e akuzuan atë se luante rolin e "zotit të jetës dhe vdekjes".
Gjykatës iu tha se ai u injektoi pacientëve doza të mëdha morfine dhe midazolami, një lloj qetësuesi, në një përpjekje për të zvogëluar ngarkesën e punës gjatë ndërrimeve të natës.
Ai u arrestua në vitin 2024 ndërkohë që do të jetë në gjendje të apelojë vendimin.
Prokurorët i kanë thënë AFP-së se po zhvillohen zhvarrime për të identifikuar viktima të tjera të mundshme, të cilat mund ta çojnë burrin në gjyq përsëri.
Çështja ka ngjashmëri me atë të ish-infermierit Niels Högel, i cili u dënua me burgim të përjetshëm në vitin 2019 pasi u dënua për vrasjen e 85 pacientëve në dy spitale në Gjermaninë veriore.
Një gjykatë arriti në përfundim se ai u dha doza vdekjeprurëse ilaçesh për zemrën njerëzve nën kujdesin e tij midis viteve 1999 dhe 2005.