Administrata Trump thotë se Universiteti i Harvardit ka shkelur ligjet e të drejtave civile, për shkak të trajtimit të studentëve izraelitë dhe hebrenj, duke rrezikuar potencialisht më tej financimin federal.
Në një letër dërguar Harvardit, administrata ka akuzuar universitetin për indiferencë të qëllimshme ndaj shqetësimeve të studentëve hebrenj që ndiheshin të kërcënuar në kampus, raporton BBC.
Ky veprim është i fundit në një seri betejash ligjore dhe financiare midis Harvardit dhe Shtëpisë së Bardhë.
Letra e parë nga BBC-ja thotë se "dështimi për të zbatuar ndryshime të përshtatshme menjëherë, do të rezultojë në humbjen e të gjitha burimeve financiare federale" për Harvardin.
"Harvardi sigurisht që mund të vazhdojë të veprojë i lirë nga privilegjet federale, dhe ndoshta një mundësi e tillë do të nxisë një angazhim për përsosmëri që do ta ndihmojë Harvardin të lulëzojë përsëri", thuhet në letrën drejtuar presidentit të Universitetit të Harvardit, Alan Gerber.
Sipas letrës, hetuesit federalë zbuluan se një "shumicë" e studentëve hebrenj raportuan diskriminim ose paragjykim kundër tyre, teksa një e katërta ishin ndjerë të kërcënuar fizikisht.
Ndër sjelljet e detajuara në letër janë pështyrja ose sulmi ndaj studentëve hebrenj.
"Mosveprimi i Harvardit përballë këtyre shkeljeve të të drejtave civile është një shembull i qartë i hierarkisë demografike që ka pushtuar universitetin. Angazhimi i Harvardit ndaj hierarkive racore, ku individët klasifikohen dhe gjykohen sipas përkatësisë së tyre në një identitet grupi të shtypur dhe jo meritave individuale, ka mundësuar përhapjen e antisemitizmit", thuhet më tej në letër.
Letra është e fundit në një seri përplasjesh midis Harvardit dhe administratës Trump, e cila ka shtuar goditjen ndaj universiteteve që pretendon se nuk kanë arritur të luftojnë antisemitizmin mes protestave kundër luftës në Gazë.
Më muajin maj, administrata udhëzoi agjencitë federale amerikane të rishikonin grantet e Universitetit të Harvardit për të ndërprerë ose rishpërndarë potencialisht fondet. Administrata vlerësoi se rreth 30 kontrata, me vlerë të përbashkët prej 100 milionë dollarësh mund të rishikoheshin.
Ajo tashmë kishte ngrirë 2.65 miliardë dollarë në grante federale dhe u përpoq të revokonte aftësinë e Harvardit për të regjistruar studentë ndërkombëtarë.
Administrata Trump gjithashtu lëshoi një njoftim të ngjashëm për Universitetin Columbia muajin e kaluar duke e akuzuar atë për shkelje të ligjit të të drejtave civile për dyshimin se nuk i ka mbrojtur studentët hebrenj nga ngacmimet. Columbia po negocion gjithashtu me administratën mbi financimin dhe autonominë e saj federale.
