Foshnja siriane jetime, e cila lindi nën rrënojat e ndërtesës ku jetonte si pasojë e tërmetit në Turqi, është zhvendosur në një “vend të sigurtë”, kanë bërë të ditur autoritetet.
Drejtoria e Shëndetësisë në Siri mori masën paraprake për të mbrojtur vajzën, Aya, nga rrëmbimi i mundshëm dhe mashtrimi i birësimit, tha një burim për BBC-në të mërkurën.
Të hënën, pati një incident të dhunshëm në spitalin ku ajo po trajtohej. Një infermier i shoqëruar nga dy burra të armatosur, dyshohet se ka rrahur menaxherin e spitalit ku po mbahej foshnja.
Kreu i drejtorisë së shëndetësisë, Dr Ahmad Hajj Hassan, mohoi pretendimet në mediat sociale se ishte një përpjekje e dështuar për të rrëmbyer Ayan.
"Akuzat për rrëmbim ishin një keqkuptim. Kjo ishte një çështje tërësisht e brendshme e lidhur me spitalin dhe nuk kishte asnjë lidhje me foshnjën”, ka thënë ai për BBC-në.
Mijëra njerëz ofruan adoptimin e foshnjës javën e kaluar, pasi historia e saj u raportua gjerësisht nga mediat vendase dhe ndërkombëtare.
Edhe
Sulmohet spitali ku po mbahet foshnja Aya që lindi nën rrënoja nga tërmeti
Gjithsesi, drejtoria e shëndetësisë është e vendosur që të ketë prioritet mirëqenien e saj dhe të veprojë me kujdes me procesin e birësimit, sipas burimit.
Nëna e Aya-s e lindi foshnjën e saj menjëherë pasi shtëpia e tyre familjare në qytetin e Jidayris u shkatërrua nga tërmeti 7.8 ballë që goditi Turqinë jugore më 6 shkurt.
