Erdogani kërkon ndihmën e NATO-s për krizën e refugjatëve

Presidenti turk, Recep Tayyip Erdogan, është takuar të martën në Bruksel me zyrtarë të lartë të NATO-s dhe Bashkimit Evropian për të kërkuar mbështetje rreth krizës së refugjatëve.

Dhjetëra e mijëra azilkërkues janë përpjekur që ta kalojnë kufirin e shtetit me Greqinë, pasi Ankaraja njoftoi se nuk do t'i ndalojë më refugjatët që synojnë të arrijnë në vendet e BE-së.

Turqia, e cila strehon rreth 4 milionë refugjatë, kryesisht sirianë, ka protestuar vazhdimisht kundër asaj që e përshkruan si ndarje të padrejtë të barrës. Në një konferencë për shtyp të mbajtur me sekretarin e Përgjithshëm të NATO-s, Jens Stoltenberg, Erdogani tha se Turqia është shtet anëtar i NATO-s, dhe kufijtë e Turqisë janë edhe kufijtë e aleancës. Ai kërkoi që NATO-ja të sigurojë mbështetje më specifike për Turqinë në drejtim të mbrojtjes, antiterrorizmit dhe refugjatëve. Stoltenbergu, megjithatë, iu përgjigj, duke thënë se Turqia duhet së pari duhet t’i përmbushë përgjegjësitë e saja për të zgjidhur çështjen e refugjatëve. Ndryshe, afro një milion civilë sirianë ikën kohëve të fundit në drejtim të kufirit turk, si pasojë e luftimeve të ashpërsuara në krahinën Idlib, mes forcave të Qeverisë siriane dhe rebelëve.