Burri humb gruan dhe djalin në të shtënat masive në Teksas

Personi i armatosur shkoi në shtëpi dhe filloi të qëllonte. Gruaja e Garcias, Sonia Argentina Guzman, 25 vjeçe, ishte në derën e përparme dhe e para që vdiq. Gjithashtu në mesin e të vdekurve ishte djali i Garcias. Ai tha se një nga gratë i kishte thënë të hidhej nga dritarja “sepse fëmijët e mi ishin pa nënë dhe një nga prindërit e tyre duhej të mbetej gjallë për t'u kujdesur për ta”

Wilson Garcia as nuk i kishte kërkuar fqinjit që të ndalonte së qëlluari me armën e tij.

Banorët në qytetin rural e tyre në veri të Houstonit janë mësuar që njerëzit të gjuajnë me armët e tyre, por ishte e premte mbrëma dhe Garcia kishte një djalë njëmuajsh që qante.

Kështu, tha Garcia, ai dhe dy persona të tjerë shkuan në shtëpinë e fqinjit për të kërkuar "me respekt" që të qëllonte më larg shtëpisë së tyre.

"Ai na tha se ishte në pronën e tij dhe mund të bënte atë që donte", tha Garcia të dielën pas një vigjilje në Cleveland, Teksas, për djalin e tij 9-vjeçar që u vra në sulmin që pasoi së shpejti.

I dyshuari, 38-vjeçari Francisco Oropeza, është në arrati, pavarësisht nga një kërkim që përfshinte më shumë se 200 policë nga juridiksione të shumta.

Garcia thirri policinë pasi Oropeza refuzoi kërkesën e tij. Burri qëlloi edhe disa herë, dhe tani dëgjohej edhe më fort. Në lagjen e shtëpive në një sipërfaqe prej 1 hektari, Garcia mund ta shihte burrin në verandën e përparme, por nuk e dinte se çfarë po bënte.

Familja e tij vazhdoi të thërriste policinë -- pesë thirrje gjithsej, tha Garcia. Pesë herë dispeçeri siguroi se ndihma po vinte.

Dhe më pas, 10 deri në 20 minuta pasi Garcia ishte kthyer nga shtëpia e Oropezas, burri filloi të vraponte drejt tij dhe të rimbushte armën.

“I thashë gruas sime: ‘Hyni brenda. Ky njeri ka mbushur armën e tij”, tha Garcia. “Gruaja ime më tha të hyja brenda sepse ‘nuk do të më qëllojë, unë jam grua’”.

Personi i armatosur shkoi në shtëpi dhe filloi të qëllonte. Gruaja e Garcias, Sonia Argentina Guzman, 25 vjeçe, ishte në derën e përparme dhe e para që vdiq.

Në shtëpi ishin gjithsej 15 persona, disa prej tyre miq që kishin qenë atje për t'u bashkuar me gruan e Garcias për lutje në kishë. I armatosuri dukej se kishte për qëllim të vriste të gjithë, tha Garcia.

Gjithashtu në mesin e të vdekurve ishte djali i Garcias, Daniel Enrique Laso, dhe dy gra që vdiqën duke mbrojtur foshnjën dhe vajzën 2-vjeçare të Garcias. Garcia tha se një nga gratë i kishte thënë të hidhej nga dritarja “sepse fëmijët e mi ishin pa nënë dhe një nga prindërit e tyre duhej të mbetej gjallë për t'u kujdesur për ta”.

"Po përpiqem të jem i fortë për fëmijët e mi", tha Garcia duke qarë. “Vajza ime disi e kupton. Është shumë e vështirë kur ajo fillon të kërkojë mamin dhe vëllain e saj (të madh)”.

Kërkimet vazhdojnë

Policia shkoi derë më derë të dielën me shpresën për të gjetur ndonjë të dhënë që do t'i çonte te i dyshuari. Guvernatori Greg Abbott ofroi 50 mijë dollarë shpërblim, zyrtarët lokalë dhe FBI-ja gjithashtu ofruan para, duke e çuar totalin në 80 mijë dollarë për çdo informacion rreth vendndodhjes së Oropezas.

“Mund t'ju them se tani për tani, ne kemi zero të dhëna”, u tha gazetarëve James Smith, agjenti special i FBI-së në krye të detyrës, ndërsa i kërkoi përsëri publikut informata në qytetin rural në veri të Houstonit, ku ndodhën të shtënat pak para mesnatës të së premtes.

Policia gjeti pushkën e stilit AR-15 që sipas tyre Oropeza e përdori në të shtënat. Autoritetet nuk ishin të sigurt nëse Oropeza mbante një armë tjetër pasi të tjera u gjetën në shtëpinë e tij, por thanë se ai konsiderohet i armatosur dhe i rrezikshëm.

Me shumë mundësi ai është larguar nga zona në këmbë. Gjatë orëve të para të kërkimit, hetuesit gjetën rroba dhe një telefon ndërsa hetonin një zonë që përfshinte pyje të dendura, por qentë gjurmues humbën kërkimin, tha Sherifi i Qarkut San Jacinto, Greg Capers.

Autoritetet ishin në gjendje të identifikonin Oropezan nga një kartë identiteti të lëshuar nga autoritetet meksikane për qytetarët që banojnë jashtë vendit, si dhe nga pamjet e kamerës së shtëpisë së Garcias. Ai tha se policia gjithashtu ka intervistuar disa herë gruan e të dyshuarit.

Capersi tha se shpresonte se paratë e shpërblimit do t'i motivonin njerëzit për të dhënë informacion dhe se kishte plane për të vendosur tabela në spanjsht për të zgjruar kërkimin. Garcia, gruaja dhe djali i tij i vrarë dhe tre viktimat e tjera - Diana Velazquez Alvarado, 21 vjeçe; Julisa Molina Rivera, 31 vjeçe; dhe Jose Jonathan Casarez, 18 vjeç — ishin nga Hondurasi.

Ende në arrati

I pyetur për shpejtësinë e reagimit, Capersi tha se oficerët arritën atje sa më shpejt që mundën dhe se ai kishte vetëm tre policë që mbulonin 1.800 kilometra katrorë.

Të dielën, shiriti policor i skenës së krimit u hoq nga shtëpia e Garcias, ku disa njerëz u ndalën për të lënë lule.

Në lagje, një agjent i FBI-së, ushtarë të Departamentit të Sigurisë Publike të Teksasit dhe oficerë të tjerë u panë duke shkuar derë më derë. Një punonjës ndaloi një kamion të kuq dhe kërkoi të shikonte brenda rimorkios së udhëtimit që kamioni po tërhiqte përpara se ta linte shoferin të vazhdonte rrugën.

Veronica Pineda, 34 vjeçe, e cila jeton matanë rrugës nga shtëpia e të dyshuarit, tha se autoritetet kërkuan nëse mund të kontrollonin pronën e saj për të parë nëse ai fshihej atje. Ajo tha se kishte frikë se personi i armatosur nuk ishte kapur ende.

"Është disi e frikshme", tha ajo. "Asnjëherë nuk e dini se ku mund të jetë".

Pineda tha se nuk e njihte mirë Oropezan, por herë pas here e shihte atë, gruan dhe djalin e tij duke hipur në kuajt e tyre në rrugë. Ajo tha se familja kishte jetuar atje qe pesë ose gjashtë vjet dhe se fqinjët kanë thirrur autoritetet në të kaluarën për t'u ankuar për njerëzit që gjuanin me armë.

Garcia gjithashtu nuk e njihte mirë Oropezan, megjithëse gratë e tyre ndonjëherë flisnin. Një herë, tha ai, burri e ndihmoi të priste një pemë.

Përktheu: Forca Jashari