Komisioni Evropian ka bërë të ditur të premten mbrëma një projekt për termocentralet bërthamore dhe të gazit, i cili synon të lehtësojë financimin e objekteve që ndihmojnë në luftimin e ndryshimeve klimatike.
Draft-teksti, i cili ka qenë në diskutim prej muajsh dhe është ende i përkohshëm, iu është dërguar vendeve anëtare më 31 dhjetor, pak para mesnatës, sipas disa burimeve të AFP-së.
Siç raportohet, ky draft-tekst përcakton kriteret për klasifikimin e investimeve në termocentralet bërthamore ose me gaz për prodhimin e energjisë elektrike si të qëndrueshme, me synimin për të drejtuar "financat e gjelbra" drejt aktiviteteve që kontribuojnë në reduktimin e gazeve serrë, raporton ‘Euronews’.
Franca, e cila dëshiron të ringjallë industrinë e saj bërthamore - një burim i qëndrueshëm e energjisë elektrike me karbon të ulët - dhe vendet e Evropës Qendrore si Polonia dhe Republika Çeke, të cilat duhet të zëvendësojnë termocentralet e tyre shumë ndotëse me qymyr, kanë bërë thirrje për një gjë të tillë.
Më tej thuhet se një klasifikim i tillë lejon një reduktim të kostove të financimit, gjë që është thelbësore për projektet në fjalë dhe për shtetet e gatshme t'i mbështesin ato.
Propozimi i Brukselit, raportohet se vendos kushte për përfshirjen e bërthamës dhe gazit, duke përfshirë një afat kohor.
Për ndërtimin e termocentraleve të reja bërthamore, projektet do të duhet të kenë marrë një leje ndërtimi përpara vitit 2045. Puna për zgjatjen e jetëgjatësisë së termocentraleve ekzistuese duhet të autorizohet para vitit 2040.