-
Përktheu:
Flutura Gashi-Mehmeti
- 23 shtator 2026 13:37
- Shpërndaje në:
Sekretari britanik i Mbrojtjes, Wes Streeting, ka deklaruar se Mbretëria e Bashkuar po rishqyrton marrëveshjen për t'ia dorëzuar Ishujt Chagos Mauritiusit.
Streeting ka konfirmuar se marrëveshja po rishikohej pasi presidenti amerikan, Donald Trump, e ka cilësuar atë si "të tmerrshme" gjatë Asamblesë së Përgjithshme të OKB-së të martën.
Marrëveshja fillestare parashikonte që Mbretëria e Bashkuar t'ia kalonte sovranitetin e territorit Mauritiusit dhe të paguante mesatarisht 136 milionë dollarë në vit për të marrë me qira bazën e përbashkët ushtarake britaniko-amerikane që ndodhet aty, e cila vlerësohet për pozicionin e saj strategjik në Oqeanin Indian.
Në prill, marrëveshja, e arritur nën drejtimin e Sir Keir Starmer, është pezulluar për një kohë të pacaktuar pasi Trump tërhoqi mbështetjen e tij.
Streeting ka thënë se "duhet" ta rishqyrtojmë marrëveshjen "sepse Shtetet e Bashkuara nuk e mbështesin atë".
"Ajo që tha dje presidenti Trump nuk ishte e re, por mendoj se ofron qartësi absolute se qëndrimi i tij lidhur me këtë marrëveshje për Chagos-in, në formën aktuale, nuk do të ndryshojë”, ka thënë ai për BBC-në.
"Pra, duhet të punojmë më tej me aleatët tanë amerikanë, me presidentin Trump dhe administratën e tij, për ta sjellë marrëveshjen në një pikë ku ai të mund ta mbështesë atë”, ka shtuar.
Streeting ka thënë po ashtu se fokusi tani do të jetë sigurimi i një garancie afatgjatë për bazën në Diego Garcia, ishulli më i madh i arkipelagut Chagos.
Ai ka theksuar se qëndrimi i çdo kryeministri britanik që nga koha e Boris Johnson-it ka qenë se procesi aktual ligjor, pasi Mauritiusi pretendon se u detyrua në mënyrë të paligjshme të hiqte dorë nga ishujt në vitin 1965 për të fituar pavarësinë, rrezikon sigurinë e bazës.
Gjatë takimit të parë ballë për ballë të Trumpit me kryeministrin, Andy Burnham, në Asamblenë e Përgjithshme të OKB-së në Neë York të martën, presidenti amerikan e ka kritikuar "marrëveshjen e tmerrshme" dhe ka thënë se Mbretëria e Bashkuar "do ta shqyrtonte" atë.
Burnham u ka thënë mediave më vonë se e ka "trashëguar situatën dhe se na duhet një zgjidhje".
"Është thelbësore të mbrohet e ardhmja e bazës; kjo ka rëndësi për ne për arsye sigurie, por qartazi edhe për Shtetet e Bashkuara. Ajo që thashë në takim është se ne do të punojmë për të gjetur atë zgjidhje mes palëve të ndryshme dhe do të punojmë fort për ta arritur atë”, ka shtuar Burnham.