Britania përballet me kërcënim të paparashikueshëm nga Irani, thotë raporti

Mbretëria e Bashkuar përballet me një kërcënim "në rritje" dhe të paparashikueshëm nga Irani dhe qeveria duhet të bëjë më shumë për ta ndaluar atë, ka paralajmëruar komisioni i inteligjencës dhe sigurisë i Parlamentit britanik.

Thirrja vjen teksa janë publikuar rezultatet e një hetimi të madh që shqyrtonte vrasjet dhe rrëmbimet shtetërore iraniane, spiunazhin, sulmet kibernetike dhe programin bërthamor të vendit.

Komisioni, i cili është i ngarkuar me mbikëqyrjen e agjencive britanike të spiunazhit, ka ngritur shqetësim të veçantë për "rritjen e ndjeshme" të komploteve kundër kundërshtarëve të regjimit iranian në Mbretërinë e Bashkuar.

"Irani përbën një kërcënim të gjerë, të vazhdueshëm dhe të paparashikueshëm për Mbretërinë e Bashkuar, shtetasit britanikë dhe interesat e Mbretërisë së Bashkuar", ka thënë Lord Beamish, kryetar i komisionit.

"Irani ka një oreks të lartë për rrezik kur kryen aktivitete ofensive. Irani është aty në të gjithë spektrin e të gjitha llojeve të kërcënimeve me të cilat duhet të shqetësohemi”, ka thënë Beamish.

Komisioni akuzon qeverinë se po përqendrohet në "menaxhimin e krizave" dhe "zjarrfikjen" me Iranin, si dhe në programin e tij bërthamor, në kurriz të kërcënimeve të tjera.

Ai thotë se kërcënimi i sigurisë kombëtare nga Irani kërkon më shumë burime dhe një qasje afatgjatë.

Raporti është botuar të enjten si pjesë e hetimit të komitetit mbi çështjet e sigurisë kombëtare që lidhen me Iranin. Ai mbulon ngjarjet deri në gusht 2023, kur komiteti përfundoi mbledhjen e provave.