Britania kundërshton kritikat se njohja e shtetit palestinez e shpërblen Hamasin

Qeveria britanike i ka hedhur poshtë kritikat se po shpërblente grupin militant Hamas, pasi shpalli planet për të njohur një shtet palestinez nëse Izraeli nuk ndërmerr hapa për të përmirësuar situatën në Rripin e Gazës dhe për të sjellë paqe.

Ultimatumi i kryeministrit britanik, Keir Starmer, i cili vendosi afat deri në muajin shtator për Izraelin, ka shkaktuar menjëherë reagime të ashpra nga homologu i tij izraelit, Benjamin Netanyahu, që është shprehur se ky vendim e shpërblen Hamasin dhe ndëshkon viktimat e sulmit të 7 tetorit të vitit 2023, ka shkruar Reuters.

Në anën tjetër, presidenti i Shteteve të Bashkuara të Amerikës, Donald Trump, ka deklaruar se nuk mendon që Hamasi “duhet të shpërblehet” me njohjen e shtetësisë palestineze.

E pyetur rreth kësaj deklarate, ministrja britanike e Transportit, Heidi Alexander, ka theksuar se kjo s’është mënyra e duhur për ta përshkruar planin e Britanisë.

“Ky s’është shpërblim për Hamasin. Hamasi është një organizatë terroriste e neveritshme që ka kryer mizori të tmerrshme. Kjo ka të bëjë me popullin palestinez. Ka të bëjë me ata fëmijë që i shohim në Gazë duke vdekur nga uria”, ka thënë ajo për radion LBC.

Pamjet e fëmijëve të uritur në enklavën palestineze kanë tronditur botën gjatë ditëve të fundit, teksa të martën një organizatë monitoruese për urinë ka paralajmëruar se skenari më i keq i urisë po zhvillohet në atë zonë, duke kërkuar veprim të menjëhershëm për të shmangur shkallën më të lartë të vdekjeve.